Zeleno-běli Bukecy
– ST Radwor 2:4 (1:1)
Zestawa hosći: Kral – Schild, Šěrak, Omran, von Karwin, Bejmak, Nuk (39. Schulze), Zimmermann, Mark (58. Hančik), Kurjat, Winar (93. Bauer)
Radworscy koparjo dyrbjachu sobotu před njezwučenej kulisu we wobłuku sportoweho swjedźenja w Bukecach nastupić. Hru dožiwi 198 přihladowarjow. Domjacy započachu z wotmachom a běchu optisce widźane lěpše mustwo. Prěnja dobra móžnosć za hosći pak wunjese jim w 6. min. nawjedowanje. Franc Winar profitowaše wot hrubeho zmylka Bukečanskeho wrotarja, kotremuž so bul přez ruce suny. Winar dyrbješe jón jenož hišće přez wrotowu liniju stłóčić. Ćišć na wrota hosći bu wotnětka wjetši, a tak so před klětku Bena Krala wjacore razy paleše. Z tróšku zbožom a bojownosću pak móžeše Radworski škit brizantne situacije wotwobarać. W 27. min. přeběža domjacy nadběhowar do šěsnatki a bu tam foulowany. Z pokutnym kopom Matthias Lange nisko do praweho delnjeho kuta wuruna. Do połčasa nastachu hišće dwě šansy za Radwor a dwě za Bukecy. Najwjetšu za hosćićela znješkódni Fabian Šěrak před wrotami hosći.