Krótkopowěsće (29.08.19)

štwórtk, 29. awgusta 2019
artikl hódnoćić
(0 )

1 200 ludźi nowe dźěło nastupiło

Budyšin. We wuchodnej Sakskej je kónc awgusta 16 796 bjedźěłnych, 127 mjenje hač w juliju (-0,8 procentow). 1 200 ludźi je nowe dźěło nastupiło, 683 bjezdźěłnych zahaji kubłanje abo powołanske dalekubłanje. Wo tym informowaše dźensa Thomas Berndt, předsyda jednaćelstwa Budyskeje wotnožki agentury za dźěło, na nowinarskej rozmołwje.

Mjez sobu so lěpje zeznać

Njeswačidło. 59 šulerjow třoch nowych rjadownjow 5. lětnika Budyskeho Serbskeho gymnazija přebywa tele dny w Njeswačanskej młodowni na „zelenym tydźenju“. Pod přewodom třoch rja­dow­niskich wučerjow a jich zastupjerjow wuži­waja woni hač do pjatka móžnosć, so lěpje mjez sobu zeznać. Zdobom zwučuja kulturny program, kotryž chcedźa na staršiskim wječoru předstajić.

Klětu wjace chwile za namjety

Budyšin. Klětuše druhe koło wubědźowanja Sakskeho fondsa „Čiń sobu!“ móhło so 1. februara 2020 zahajić. Detaile k tomu maja hač do kónca lěta 2019 jasne być. Dobu zapodaća namjetow chcedźa na połdra měsaca rozšěrić. To rjekny regionalna managerka Sakskeho fondsa „Čiń sobu!“ Gabriela Hippe wčera na nowinarskej rozmołwje z lětušimi lawrea­tami w Serbskim domje.

Njetrjebawšej wupadaj

Düsseldorf. Zwjazkowy koparski ligist Fortuna Düsseldorf je přećelsku hru pola wyšeho ligista TSV Meerbusch droho zapłać­ił. Fortuna doby jasnje 6:0, ale Marcel Sobottka a Kasim Adams so zraništaj a po oficialnych informacijach kluba­ dlěši­ čas wupadnjetaj. Sobottka je sej­ w lěwym wobłuku aduktorow niće torhnył, Adams je sej tohorunja niće torhnył, a to w lěwym nadkolenje.

Bjez poražki do wosmifinala

Bratislava. Jako skupinska dobyćerka zaćehnje němske narodne wolejbulowe mustwo žonow do wosmifinala europskich mišterstwow. Chowanče zwjazkoweho trenarja Felixa Koslowskeho přewinychu w poslednjej hrě skupiny D Běłorusku z 3:0. Tak wostanu wone jako jeničke mustwo stafle bjez poražki a nastupja we wosmifinalu přećiwo Słowjenskej.

wozjewjene w: Krótkopowěsće
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND