Krótkopowěsće (06.09.19)

pjatk, 06. septembera 2019
artikl hódnoćić
(0 )

K wuspěchej zatamane

Berlin/Drježdźany. Po měnjenju by­wšeho sakskeho ministerskeho prezidenta Kurta Biedenkopfa (CDU) su unija, SPD a Zeleni k wuspěchej zatamane knježerstwo wutworić. „Nětko dyrbi so poradźić, zo so tři strony tak zwjazaja, zo změja w parlamenće stabilnu wjetšinu“, rjekny wón w interviewje z redakciskej syću Němska. „Sakska to trjeba – tež zo by stronje AfD hranicy sadźała.“

Wo analfabetizmje njerěča

Plauen. Něhdźe 300 000 Saksow prawje čitać a pisać njemóže, kaž ze zwjazkoweho přepytowanja Leo 2018 wuchadźa. Po słowach Ingrid Ficker z Plauenskeho koordinowanišća alfabetizm – skrótka „Koalpha“ – je dwanaće procentow 18- do 65lětnych w ludnosći potrjechenych. Tući wo tym njerěča, skerje so za móžnosćemi w Sakskej wobhonjeja słabosće přewinyć. Njedźelu je swětowy dźeń alfabetizacije.

Robert Mugabe njeboh

Harare. Wjelelětny prezident Simbabwy Robert Mugabe je 95lětny zemrěł. Tuchwilny prezident Emmerson Mnangagwa wobkrući dźensa wotpowědne rozprawy na Twitteru. Mugabe bě rjek wuswobodźenja, poslednje lěta pak jako prezident jara awtoritarnje knježeše. 2017 su jeho po 37 lětach wotsadźili.

Hirscher karjeru zakónčił

Salzburg. Awstriski spěšnosněhakowar Marcel Hirscher swoju profijowu karjeru zakónči. 30lětny je wosom króć zasobu cyłkowne hódnoćenje swětoweho cupa dobył a tak rekord nastajił. Na 67 swětowych cupach steješe wón na podesće dobyćerja,­ dwójce zawěsći sej olympiske złoto. Po Felixu Neureutheru zhubi sněhakowarski­ sport dalšeho sportowca ekstraklasy.

Němska bjez Goretzki

Hamburg. Srjedźopólny hrajer FC Bayern Mnichow Leon Goretzka w kwalifikaciskej hrě za europske koparske mišterstwa wupadnje. Dźensa wječor nastupi němske narodne mustwo w Hamburgu přećiwo Nižozemskej. 24lětny njemóže nutřkowneho krawjenja dla pódla być. Póndźelu wječor zetka so němska wubranka w Belfasće ze Sewjeroirskej.

wozjewjene w: Krótkopowěsće
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND