Krótkopowěsće (13.09.19)

pjatk, 13. septembera 2019
artikl hódnoćić
(0 )

Zettwitz Zhorjelc wopušći

Zhorjelc. Decernentka Zhorjelskeho wokrjesa Heike Zettwitz budźe nowa społnomócnjena wokrjesa Dubja-Sprjewja. Předwčerawšim je ju tamniši wo­krjesny sejmik ze 44 ze 46 móžnych hłosow wuzwolił. Nowe zastojnstwo chce wona w nowembru nastupić. W Zhorjelskim wokrjesu nawjedowaše Zettwitz wobswětowy, twarski, lěsniski a wokrjesny wuwićowy zarjad kaž tež zarjadnistwo za nadróžny wobchad a porjad.

Wjesnjanostow witali

Radwor. Na žurli Radworskeho hosćenca „Meja“ přewjedźechu dźensa kóždolětne posedźenje přirady energijoweho zastaraćela Enso a Drježdźanskeho zastaraćela Drewag. Wjesnjanosta Wincenc Baberška móžeše měšćanostow a wjesnjanostow ze wšeje wuchodneje Sakskeje witać. Na spočatku rozłoži Tomaš Rječka přitomnym Radworske centralne tepjenje.

Filmy zapodać

Choćebuz. Łužiscy filmowcy su namołwjeni swoje produkcije za Łužisku filmowu přehladku hač do 15. oktobra zapodać. Wona je wobstatk Choćebuskeho filmoweho festiwala, organizatorojo zdźěleja. Paski pak njesmědźa komercielnje produkowane być. Najlěpšemu kiwa 1 500 eurow. Wosebite myto spožči Załožba za serbski lud najlěpšemu filmej, wěnowacemu so Serbam a dwurěčnosći.

Tež Moisander zranjeny

Bremen. Dalši hrajer zranjenja dla pola zwjazkoweho koparskeho ligista Werder Bremen dlěši čas wupadnje. Kapitan Niklas­ Moisander je sej musklowu nić tor­hnył a jutře w hrě přećiwo mustwu Union Berlin k dispoziciji njebudźe. Hrajer finskeje narodneje wubranki je nětko hižo dźewjaty wupad Werdera. Mustwo steji na 13. městnje tabulki.

Druha poražka profijow NBA

Dongguan. Z najsłabšim wuslědkom swojich stawiznow narodne basketballowe mustwo USA swětowe mišterstwa w Chinje zakónči. Po wčerawšim 89:94 přećiwo Serbiskej hraja profijojo NBA jenož hišće wo 7. městno. To běše hižo druha poražka po štwórćfinalu přećiwo Francoskej. W hrě bě Bogdan Bogdanović z 28 dypkami matchwinner Serbiskeje.

wozjewjene w: Krótkopowěsće
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND