Krótkopowěsće (04.10.19)

pjatk, 04. oktobera 2019
artikl hódnoćić
(0 )

Eyckec nowy album wudała

New York. „Elegies for theremin & voice“ rěka nowy, nětko wušły album Caroliny Eyckec. Zynkonošak wopřijima swójske kompozicije tereministki, kotrež je wona w běhu dweju lět w New Yorku nahrawała. Hač do kónca nowembra předstaji serbska wirtuozka twórbu, kotraž je tež jako winylowa LP na předań, z wobšěrnej turneju po Americe a Europje.

Pjenjezy za robotery

Drježdźany. 1,8 milionow eurow přewostaja sakske strowotniske ministerstwo za projekt „Care4All“. Z nim pruwuja zasadźenje roboterowych systemow w hladanju a terapiji na demencu schorjenych testuje. Srědki pochadźeja z Europskeho fondsa za regionalne wuwiće. Zaměr projekta je, roboterowe systemy trajnje w hladarnjach předewzaća Cultus gGmbH Drježdźany a w neurologiskej klinice Drježdźanskeho uniwersitneho klinikuma zasadźić.

Trenarja pušćili

Chrósćicy. SJ Chrósćicy je swojeho koparskeho trenarja Detlefa Panitza pušćiła. Wón bě mustwo loni w lěću přewzał a je z nim krajnu klasu-wuchod dźeržał. Jeho naslěduje hnydom dotalny kotrenar a wjelelětny hrajer Chróšćanow Pavel Runt. Njedźelu wočakuje jich ST Rakecy na wokrjesny derby.

Borussia w Čěskej dobyła

Praha. Zwjazkowemu koparskemu ligistej Borussia Dortmund je so wažny krok do směra na wosmifinale champions league poradźił, dobywši přećiwo čěskemu mištrej Slaviji Praha 2:0. Borussia nawjeduje nětko tabulku ze štyrjomi dypkami před FC Barcelonu, kotraž ma samsnu ličbu dypkow. RB Lipsk podleža cyłkej Olympique Lyon 0:2 a dyrbješe tak poziciju načolnika w skupinje spušćić.

Kaul kral lochkoatletow

Doha. Niklas Kaul je so z kralom lochkoatletow stał. 21lětny doby na swětowych mišterstwach w katarskim Doha dźesaćibój z wosobinskim rekordom 8 691 dypkow. Tak je druhi němski swětowy mišter po Torstenu Vossu, kiž bě sej 1987 titul zawěsćił. Kaul ćisny hlebiju 79,05 metrow daloko, štož njebě w dźesaćiboju hišće ženje do toho docpěł.

wozjewjene w: Krótkopowěsće
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND