Krótkopowěsće (16.02.24)

pjatk, 16. februara 2024
artikl hódnoćić
(0 )

Diferencu móža wurunać

Róžant. Zo móhła gmejna Ralbicy-Róžant diferencu w swojim lětušim hospodarskim planje wurunać, dyrbja 255 000 eurow ze swojich likwidnych srědkow nałožić. Tole zdźělichu na wčerawšim posedźenju gmejnskeje rady. Dohromady chcedźa něhdźe 3,8 milionow eurow wudać. Najwjetše wudawki planuja za nowotwar Ralbičanskeje pěstowarnje. (Wjace wo tym w póndźelnym wudaću.)

Wupisanje serbskeje rady

Drježdźany. Wupisanje za dźěłowe městno wěcywobdźěłarki w jednaćelni Rady za serbske naležnosće Sakskeje běži hač do kónca měsaca. Požadarjo njech zapodadźa podłožki na personal@ smwk.sachsen.de. Dźěłowy čas wučinja 20 hodźin tydźensce. Dźěło doma je móžne a tež wjac dźěłoweho časa – přez nadawk w spěchowanju kultury.

Pjenjezy za dźiwadło

Halle/Budyšin. Kulturna załožba Zwjazka spěchuje pjeć nowych projektow ze cyłkownje 746 100 eurow w swobodnym staće. Tole zdźěli załožba wčera w Halle. Z toho profituje mjez druhim Němsko-serbske ludowe dźiwadło w Budyšinje, kotrež ma za festiwal „Witajće druhdźe“ 77 100 eurow dóstać. Zarjadowanje chcedźa w septembrje wotměć.

wozjewjene w: Krótkopowěsće
Prošu přizjewće so, chceće-li komentar podać

Serbska debata

nowostki LND