Klimowi aktiwisća před sudnistwom
To a tamne (26.03.24)
Po wozjawnjenju, zo je britiska princesna Kate na rak schorjeła, registruja pomocne organizacije za na rak schorjenych w kraju widźomny rozrost ličby zajimowanych. Tak je ličba kontaktow ludźi na internetnych stronach tutych organizacijow na 50 000 wob dźeń rozrostła. Kate bě minjeny pjatk w jara wosobinskim widejowym poselstwje zdźěliła, zo je na rak schorjeła. Lěkarjo běchu tole při njedawnej operaciji zwěsćili. Mjeztym je princesna chemoterapiju zahajiła.
Ze sputanymaj rukomaj je jaty Augsburgskeho jastwa wčera ćeknył. Policija dźensa dale za nim pytaše. 47lětny je pěši na ćěkancy. Dokal je běžał, njebě spočatnje jasne. Rěčnik jastwa njemóžeše rjec, kak je so jatemu poradźiło, na lěkarskim terminje z jastwa twochnyć. Policija wobydlerjow prosy, podhladne wobkedźbowanja hnydom přizjewić.
Za nawrót dźěći so zasadźił
Rom (B/S). Ukrainske knježerstwo je so njedawno kardinalej w bamžowskej misiji Mattejej Zuppijej za jeho humanitarne zasadźenje za nawrót zawlečenych ukrainskich dźěći z Ruskeje podźakowało. Wjetšinu wuswobodźenych ukrainskich dźěći přepodachu pomocnym organizacijam a zamołwitym z Vatikana.
Za europski zjězd katolikow
Passau (B/SN). Prezident Europskeje ludoweje strony (EVP) w Europskim parlamenće Manfred Weber wabi za mjezy překročacy zjězd katolikow w Passauwje. „Trjebamy dialog a europske wuznaće k cyrkwjam“, praji wón na nalětnjej hłownej zhromadźiznje diecezanskeje rady. Zamołwići katolscy a ewangelscy wěriwi so paralelnje z přichodnym europskim ekumeniskim zetkanjom cyrkwjow zaběraja.
Směrnicy wozjewjene
Bonn (B/SN). Duchowne zwučowanja za pohłubšenje poćaha wěriwych k Bohu mjenuja so eksercicije. Za nje je Němska biskopska konferenca zwjazowace směrnicy wozjewiła, zo njebychu je duchowne awtority znjewužiwali a zo bychu jasne standardy za wukubłanje fachowych přewodnikow měli.
Přećiwo ekstremizmej
Wjacori mortwi při wohenju
Solingen (dpa/SN). Po dramatiskim wulkim wuhenju w starym twarjenju w sewjerorynsko-westfalskim Solingenje z třomi smjertnymi woporami wohnjowa wobora dale za zhubjenym dźěsćom pod třěchu pyta. Při wohenju běchu dwaj dorosćenaj a małe dźěćo žiwjenje přisadźili. Dźewjeć wobydlerjow so zrani. Wjacori ludźo běchu před płomjenjemi z woknom skočili. Woheń w drjewjanym domje bě dźensa wokoło 2 hodź. z dotal njeznateje přičiny wudyrił.
FDP chce w koaliciji wostać
Berlin (dpa/SN). FDP chcyła po słowach swojeho městopředsydy Wolfganga Kubickija dale w amplowej koaliciji z SPD a Zelenymi wostać. Kubicki w rozmołwje z nowinarjemi zdobom wuprajenja předsydy CDU Friedricha Merza kritizuje, kiž žada sej dočasne nowowólby. Merzej Kubicki wumjetuje, zo sej we „wulkobłudźe“ mysli, zo móhł termin nowowólbow zwjazkoweho sejma sam postajić. „To žno je chětro fatalne“, Kubicki rjekny.
Lěwicy za štyri dny dźěła
Wyši měšćanosta Döbelna Sven Liebhauser (CDU, wotlěwa), ...
Terorisća před sudnistwom
Moskwa (dpa/SN). Jedne z Moskowskich sudnistwow je wčera wječor prěnje zajeće přećiwo pozdatnym akteram krawneho teroroweho nadpada na koncertnu žurlu na sewjeru Moskwy wukazało. Po atentaće bě policija jědnaće podhladnych zajała, štyrjo z nich běchu podhladni, zo su třěleli. W centrumje za zarjadowanja Crocus City Hall pola Moskwy běchu wjacori skućićeljo pjatk wječor zaměrnje na wopytowarjow třěleli a po tym twarjenje zapalili. Při tym je znajmjeńša 137 ludźi zemrěło. Štyrjoch pozdatnych atentatnikow su wčera na sudnistwo dowjezli. Wobskorženi běchu zranjeni. Dwajo z nich su njeskutk pječa přiznali.
Mjeztym je Francoska najwyši wěstotnych schodźenk wukazała. Terorowa milica Islamski stat bě so k nadpadej w Moskwje wuznała. Francoska čuje so wot islamistow tohorunja wohrožena.
Trumpej hrozy sćazanje
Baerbock na Bliskim wuchodźe
Kairo (dpa/SN). Wonkowna ministerka Annalena Baerbock (Zeleni) sej wot Israela a Hamas žada, zo so na časowje wobmjezowany přiměr dojednatej. „Jenož hnydomny humanitarny přiměr, kiž wjedźe k trajacemu měrej, nadźiju na měr dale wobchowa, za Palestinjanow kaž tež za Israelčanow“, rjekny politikarka Zelenych do swojeho wotlěta. Dźensa wočakowaše ju w egyptowskej stolicy Kairu wonkowny minister Samih Shukri. Po tym chcyše Baerbock dale do Israela lećeć. Wječor chcyše so wona z palestinskim prezidentom Mahmudom Abbasom a wonkownym ministrom Riadom Malkim w Ramallahu zetkać.
Baerbock žada sej wot Hamas, zo brónje hnydom złoži. Přiwšěm je sej Baerbock wěsta, zo njeje ryzy wojerske postupowanje přećiwo islamistiskej organizaciji wuspěšne. Runočasnje steji Němska kruće poboku Israela, wona rjekny.
Při jednanjach dźe wo přiměr na dobro palestinskich ciwilistow a wo pušćenje zastajencow, kotrychž bě Hamas 7. oktobra 2023 zawlekła.
Zaso wjace zajacow w Němskej
Populacija dołhowuchačow rozrostła – žiwjenski rum wohroženy
Berlin (dpa/SN). Wohrožene zajacy na polach su so w Němskej zaso widźomnje rozmnožili. W nalěću 2023 skakaše přerěznje 19 zajacow na kwadratny kilometer po polach, łukach a zahonach. „To je wjelelětny rekord“, zdźěli rěčnik Němskeho hońtwjerskeho zwjazka (DJV) Torsten Reinwald powěsćerni dpa. Je to najwyša ličba zajacow po zahajenju cyłoněmskeho ličenja 2001. Předewšěm suche nalěćo 2023 je zajacam optimalne wuměnjenja za wothladanje dorosta skićiło. Nalěćo je najwažniša doba za dorost zajacow. Lěta 2022 běchu hajnicy po wšej Němskej hišće přerěznje 16 zwěrjatow na kwadratny kilometer zličili.
