Wótry wołojnik (04.06.20)
To a tamne (04.06.20)
Měrneje nocy na policajskej straži dla je so połstalětny muž w Bremerhavenje na jeje teren zadobył. Chětro natutkany zalěze tam přez železny płót. Sobudźěłaćerka straže pak jeho na awtomatiskej kamerje wuhlada. Wulce zadźiwanym policistam muž rozłoži, zo chce skónčnje zaso raz woměrje spać, bjez mylenjow druhich. Zastojnicy pak dyrbjachu jemu přeće wotpokazać, dokelž njebě žaneje přičiny zajeća. Dyrbješe tuž zaso woteńć.
Ryzy lóšt na pućowanje je wosomlětneho pachoła z městačka Flöha pohnuł so z ćahom do Kamjenicy nastajić. Na tamnišim dwórnišću hólčec zastojnikam zwjazkoweje policije napadny, dokelž bě sam po puću. Tym wón rjekny, zo chce so na wulět podać, bjeztoho zo staršej wo tym wěstaj. Něhdźe 15 mjeńšin trajaca wróćojězba bě za njeho ćim zajimawša: W policajskim awće dowjezechu hólca domoj k staršimaj.
Wjace bjezdźěłnych korony dla
Nürnberg (dpa/SN). Ličba bjezdźěłnych w Němskej je w meji jako sćěh koronakrizy porno aprylej hišće raz wo 169 000 na nětko 2,813 milionow rozrostła. Kwota bjezdźěłnosće zwyši so wo 0,3 na 6,1 procent, kaž zwjazkowa agentura za dźěło w Nürnbergu zdźěli. Jeničce w meji su předewzaća za dalše 1,06 mio. ludźi krótkodźěło přizjewili. Hač do toho bě dźesać milionow ludźi w krótkodźěle.
Zběhnu warnowanje
Berlin (dpa/SN). Zwjazkowe knježerstwo je wobzamknyło, powšitkowne warnowanje před pućowanjom do cyłkownje 29 europskich krajow wot 15. junija zběhnyć. To je wonkowny minister Heiko Maas (SPD) po posedźenju kabineta zdźělił. Za Norwegsku a Španisku drje so naprawa dliji, dokelž matej wobaj krajej mjezu hišće hač do 21. junija zawrjenu. Maas bě warnowanje za turistow 17. měrca koronapandemije dla za 200 krajow swěta wukazał, štož je w dotalnych stawiznach jónkrótny podawk.
Italska mjezu wočiniła
Wojacy wukładuja posyłku lěkarskich pomocnych srědkow z Chiny na ...
Maas hroženje Trumpa zasudźa
Berlin (dpa/SN). Zwjazkowy wonkowny minister Heiko Maas (SPD) hroženje prezidenta USA Donalda Trumpa, přećiwo demonstrantam w kraju w nuzy wójsko zasadźić, raznje zasudźa. „Město toho zo wolij do wohenja kidamy, dyrbimy wujednać. Město toho, zo damy so rozpačić, dyrbimy so přećiwo radikalnym ekstremistam zjednoćić“, rjekny Maas magacinej Spiegel. Štóž z namocu hrozy, tón dalšu namóc zbudźa. „Demokraća njesměli nihdy eskalěrować, tež nic ze słowami“, Maas doda.
Trump bě póndźelu wječor hrozył wójsko zasadźić, zo by zdźěla namócne demonstracije přećiwo rasizmej a policajskej namocy skónčił. Nastork protestow bě smjerć Afroameričana Georgea Floyda brutalneje namocy policije dla.
Protesty traja
Washington (dpa/SN). Protesty přećiwo rasizmej a policajskej namocy w USA su tež minjenu nóc dale šli. We Washingtonje su so demonstranća znowa před Běłym domom zhromadźili a tak zakaz, swoje bydlenja wopušćić, ignorowali. Zakaz płaći poprawom wot 19 hodź. Tež w druhich metropolach USA dóńdźe k demonstracijam, kotrež njeběchu hižo tak namócne kaž minjene dny.
W New Yorku su demonstranća hižo druhi dźeń za sobu zakaz, dom wječor wopušćić, ignorowali. Powěsćowy sćelak CNN pokazowaše wobrazy dołheho ćaha demonstrantow, kotřiž so do centruma města podachu. Na kromje protestow je znowa k namócnosćam dóšło. Demonstranća rozbichu wokna wjacorych New- Yorkskich luksusowych wobchodow
Namołwjeja do boja přećiwo hidźe
Berlin (dpa/SN). Wjacori zwjazkowi ministrojo su sej składnostnje róčnicy smjertneho atentata na Kasselskeho knježerstwoweho prezidenta Waltera Lübcku konsekwentne postupowanje přećiwo prawicarskemu ekstremizmej žadali, a to pod hesłom „Prawicarski ekstremizm a rasizm moritej“. W interneće skedźbni wčera wonkowny minister Heiko Maas (SPD) na morjenje Lübcki a na Hanauski atentat, kiž bě runje před sto dnjemi. „Hida njemori jenož w USA, ale tež w našim kraju. Wobarajmy so tomu zhromadnje.“
Zwjazkowa justicna ministerka Christine Lambrecht (SPD) rjekny rozhłosownikam, zo wuchadźa ze stron prawicarjow najwjetši strach. Za to je mjeztym nowe wědomje w towaršnosći nastało. Kaž zwjazkowy nutřkowny minister Horst Seehofer (CSU) zwurazni, je tež lěto po morjenju Lübcki přeco hišće zludany. Walter Lübcke (CDU) bu w nocy na 2. junij 2019 na terasy swojeho domu w Kasselskim wokrjesu přez wutřěl do hłowy morjeny. Proces přećiwo jeho mordarjej a toho pomocnikej zahaja 16. junija.
Zaso wjace studentow zdobyć
Braniborska techniska uniwersita zdźěłuje nowy profil do přichoda
Podstupim (dpa/SN). Z nowowusměrjenjom swojich šěsć fakultow chce so Braniborska techniska uniwersita (BTU) Choćebuz-Zły Komorow do přichoda wukmanić a zaso wjace studentow zdobyć. Hač do kónca lěta chce wysoka šula, kotraž ma so po planach krajneho knježerstwa z motorom strukturneje změny stać, plan wuwića BTU wot lěta 2021 do 2026 předpołožić. „Chcemy techniske studijne směry modernizować a tak swoje kubłanišćo atraktiwniše sčinić“, rjekny amtěrowaca prezidentka Christiane Hipp powěsćerni dpa.
To a tamne (03.06.20)
Nic na konju, ale z awtom je muž po konjacym wubědźowanišću w Gelsenkirchenje smalił. 22lětny jědźeše po wuprajenju swědkow njedźelu wječor pozdźe z wulkej spěšnosću a bjez swěcy po pěskojtej čarje. Swědcy awto zadźeržachu a tomu zadźěwachu, zo móžeštaj so muž a sobujěduca zminyć, prjedy hač policija dojědźe. Zastojnicy wupisachu jimaj skóržbu. Čehodla běchu wrota wočinjene, njeje znate.
Wulki zajim kruwow zbudźił je wčera błyskač policajskeje kontrole spěšnosće na kromje Bielefelda. Foto policije pokazuje na wšě dźesać howjadow, kotrež steja wusko pódla so a hladaja wćipne přez płót na mobilnu radarowu připrawu policije. Błyskało je wutoru woprawdźe dosć: 37 z cyłkownje 438 kontrolowanych awtow bě přespěšnje po puću. Najspěšniši bě šofer ze 107 kilometrami na hodźinu na dróze, hdźež je 60 km/h dowolene.
Kroča po nowych pućach
Lipsk (B/SN). Z Božej słužbu w Lipšćanskej ewangelskej cyrkwi swj. Mikławša su spočatk meje fararja Lüdera Laskowskeho do noweho misionskeho zastojnstwa zapokazali. Słužbu jako farar započa wón 2009 we wosadźe Großschirma. W tym času bě tež zamołwity za studentow Freibergskeje Hórniskeje akademije. Nadawk 46lětneho duchowneho w Lipsku nětko je, wuwiće cyrkwinskeho skutkowanja w nowych dźělach města nawjedować. Ewangelsko-lutherski cyrkwinski wobłuk w Lipsku tak swoje skutkowanje rozšěri. W přichodnych dźesać lětach ma znajmjeńša 30 000 bydlenjow w nowych měšćanskich dźělach, kaž na přikład při něhdyšim hłownym dwórnišću w Gohlisu, nastać. Z diakoniju ma Laskowski wšelke socialne projekty wuwiwać a wothłosować. Wjace k tomu pod www.kirche-die-weiter-geht.de
Dušepastyrstwo při telefonje
