Krótkopowěsće (16.07.15)

štwórtk, 16. julija 2015 spisane wot:

Krajnoradny zarjad rozšěrja

Zhorjelc. Zarjadnistwo Zhorjelskeho wokrjesa nakupi dalše ležownosće w hódnoće 1,3 milionow eurow. Za to dósta wčera popołdnju wot wokrjesneho sejmika zelenu swěcu. W jednym z kupjenych twarjenjow ma chorobna kasa Barmer hišće swoje rumnosće. Tam maja so zaměstnić Zhorjelske wonkowne wobłuki twarskeho dohlada a přizjewjernja jězdźidłow.

Wjelk we wowcach pobył

Kodersdorf. W nocy na srjedu je wjelk blisko Kodersdorfa we wowčim stadle škodu načinił. Na wobhrodźenej pastwje blisko awtodróhi A 4 paseše so sydom Kamerunskich­ wowcow. Z tych je wjelk prawdźepodobnje dwě zakusał. Jednu wowcu hišće pytaja. Dotal su lětsa w Sakskej 28 padow zregistrowali, w kotrychž je wjelk škodu na domjacym skoće abo na plahowanej dźiwinje zawinił.

Kónc za kliniku

Krótkopowěsće (15.07.15)

srjeda, 15. julija 2015 spisane wot:

Spožča Myto přichoda

Choćebuz. Mjez dobyćerjemi lětušeho braniborskeho Myta přichoda stej tež Choćebuskej předewzaći Kunella Feinkost a Elbewald. Z 90 požadarjow wo myto je njewotwisna jury dźewjećoch wu­zwoliła. Myto spožčić chcedźa 6. no­wembra na swjedźenskim zarjadowanju na hrodźe Neuhardenberg.

Čěske jastwa zaso połne

Praha. Po aktualnych wozjewjenjach su čěske jastwa přepjelnjene – a to ze 103 procentami swójskeje kapacity. Staw je tuž samsny kaž do januara 2013, jako běchu­ jastwa po wobšěrnej amnestiji tehdyšeho prezidenta Václava Klausa chě­tro wuprózdnjene. Pobrachowace městna chcedźa hišće lětsa zarjadować, knježerstwo zdźěla.

Sakske firmy dypkownje płaća

Hamburg. Sakske předewzaća maja w cyłoněmskim přirunanju najlěpšu płaćensku moralku. Tole wuchadźa ze stu­dije Hamburgskeje hospodarskeje słužby Bürgel. Tak je w meji jenož 12,9 procentow sakskich firmow swoje zličbowanki přepozdźe płaćiło abo scyła nic. Přerězk Němskeje leži pola 16,5 proc. Najšpatnišu moralku maja w Posaarskej (22,1 procent). Prašane bu 470 000 firmow.

Koparski hrajny plan wušoł

Krótkopowěsće (14.07.15)

wutora, 14. julija 2015 spisane wot:

Merkel w Drježdźanach była

Drježdźany. Zwjazkowa kanclerka An­ge­la Merkel je so dźensa w Drježdźanach wo najnowšich wuwićach na polu mikroelektroniki wobhoniła. Zhromadnje z mi­­nisterskim prezidentom Stanisławom Ti­li­chom a ministerku za slědźenje Johannu Wanku (wšitcy CDU) wopyta wona předewzaći Globalfoundries a Infineon kaž tež Frauenhoferski institut.

Trjebaja mjenje brunicy

Essen. Energijowy koncern RWE trjeba hač do kónca lěta hač do 15 procentow mjenje wuhla k zmilinjenju hač minjene lěta. Dotal pak hišće njewědźa, kotre blo­ki­ milinarnjow zawru, koncern dźensa zdźěli. Ludźi pušćić chcedźa na „fairnje a znjesliwe wašnje“, kaž rěkaše. Zwjazkowe knježerstwo bě rozsudźiło, starše bloki zawrěć a koncerny za to wotškódnić.

Špatna nalada w firmach

Halle. Nalada we wuchodoněmskich industrijnych předewzaćach je dale po­chmurjena. To poćahuje so na posu­dźowanje aktualneho połoženja kaž tež na wočakowanja do přichoda, Institut za hospodarske slědźenje w Halle zdźěla. Woprašeli běchu so 300 předewzaćow.

U19 hižo zwrěšćiła

Krótkopowěsće (13.07.15)

póndźela, 13. julija 2015 spisane wot:

Philipp Mißfelder njeboh

Berlin. Zapósłanc CDU w zwjazkowym sejmje Philipp Mißfelder je njeboh. 35lětny wonkopolitiski rěčnik frakcije unije zemrě minjenu nóc na emboliju płucow, kaž prezidij CDU zdźěli. Wón zawo­staji mandźelsku a dwě dźěsći. Mißfelder bě wot lěta 2005 zapósłanc zwjazkoweho sejma, wot 2002 hač do 2014 předsyda Młodeje unije Němskeje.

Nowe jězdźidła za pomoc

Budyšin. Sakski minister za nutřkowne naležnosće Markus Ulbig (CDU) je minjeny pjatk nowe awta za transport chorych přepodał. Wuchowanskej słužbje wo­krje­sow Budyšin a Zhorjelc dó­stanjetej kóžda tři nowe jězdźidła. Stare njebudu hižo wužiwane. W nowych awtach hodźa so pacienća tež zastarać.

Ponowja čěski dźěl přistawa

Praha/Hamburg. Čěska republika chce swój dźěl Hamburgskeho přistawa, tak mjenowany „Moldauhafen“, ponowić a jón lěpje zwičnić. Po rekonstrukciji piera kaž tež twarjenjow móhli tam hač do 15 łódźow kótwicować. Wot lěta 1929 wotnaja bywša Čěskosłowakska tři hektary Hamburgskeho přistawa, mjeztym pak je přestrjeń chětro zapušćena.

HSV dobył – FC Bayern posledni

Krótkopowěsće (10.07.15)

pjatk, 10. julija 2015 spisane wot:

Amokowy třělc dweju morił

Leutershausen. Amokowy třělc je dźensa dopołdnja w srjedźnej Frankskej dwě wosobje morił. Po informaciji policije zatřěli wón w Tiefentalu we wokrjesu Ansbach ze swojeho awta žonu. Krótko po tym mori muž w susodnej wsy ko­lesowarja, na čož ćekny. Policija móžeše jeho krótko na to zajeć. Motiw njeskutka njeje dotal znaty.

Wuswědčenja dóstali

Budyšin. Z přepodaćom wuswědčenjow je so za 42 000 šulerjow w Hornjej Łužicy dźensa šulske lěto zakónčiło. Minjene dny zeznajomichu so mnohe rjadownje na pućowanskich dnjach ze zajimawostkami w bližej domiznje. Nětko maja hólcy a holcy wulke prózdniny. Přichodny tydźeń poskićeja tež serbske zakładne šule prózdninsku zaběru.

Mjeńše naroki na wojakow

Praha. Čěska armeja chce někotre strowotne žadanja nastupajo zastup do swojich rjadow trochu „złahodnić“. Z wojakom stać móhli so tak na přikład tež ludźo­ ze synowej porskawu abo z lóšim defektom tarčoweje žałzy. Zamołwići reaguja na tučasny staw, po kotrymž hač do 60 procentow zajimcow za armeju postajene strowotne měritka njespjelni.

Krótkopowěsće (09.07.15)

štwórtk, 09. julija 2015 spisane wot:

Kulturny dom wuchowany

Biskopicy. Kulturnemu domej w Biskopicach kiwa wuchowanje. Skupina předewzaćelow chce insolwentny zawod nazymu přewzać. Dom steji hižo dlěši čas prózdny, po tym zo bě wobhospodarjenje zwrěšćiło. Přewzaće objekta je so poradźiło dźakowano prócowanjam noweho Biskopičanskeho wyšeho měšćanosty prof. Holma Großy.

Darmotna jězba za jedynku

Zhorjelc. Šulerjo z jedynku na wuswědčenju smědźa jutře, posledni šulski dźeń, ćahi předewzaća Trilex darmotnje wužiwać. Wuměnjenje je, zo móža znajmjeńša jednu jedynku na wuswěd­čenju pokazać, hromadźe z wupokazom, pak šulerskim pak personalnym. Ćahi Trilex jězdźa tež ze Zhorjelca přez Budyšin do Drježdźan.

Wjace pjenjez swobodnym šulam

Drježdźany. Šule w swobodnym nošerstwje dóstanu wot klětušeho wjace pjenjez. To je Sakski krajny sejm z hło­sami CDU a SPD wobzamknył. Po tym zwyši so lětna přiražka stata na šulerja na nimale tysac eurow. Jeničce klětu chce kraj za to 327 milionow eurow nałožić, 250 milionow wjace hač dotal. Financowanje šulow dyrbješe so po wukazu sudnistwa znowa rjadować.

Krótkopowěsće (08.07.15)

srjeda, 08. julija 2015 spisane wot:

Staršiski list z nowym wobličom

Budyšin. Sčasom do prózdnin je wušoł Staršiski list Serbskeho šulskeho towarstwa, zaběracy so tónkróć ze strowotu a chorosću dźěći. Znata lěkarka dr. Uta Libšowa wupraja so k tradicionalnej chinskej medicinje. Nimo toho móžeće přinošk maćerje Sonje Rybaroveje čitać, kotraž ma swoje dźěćo w Malešanskej pěstowarni „K wódnemu mužej“.

Nowy serwis biblioteki

Wojerecy. Měšćanska biblioteka Wo­jerecy rozšěri wot nazymy swój serwis. Potom budźe móžno, swoje wupožčene knihi sej přiwjezć a zaso wotewzać dać. Mobilny knižny serwis budźe jónu wob měsac po puću a zastara wosebje tych čita­rjow, kotrymž je puć do biblioteki přewobćežny.

Namjezny přechod so zhubi

Wodowe Hendrichecy. Dźensa su ně­hdyši namjezny přechod we Wodowych Hendrichecach wottwarjeć započeli. Po informacijach krajneho zarjada za dróhotwar a wobchad chcedźa runočasnje na 300 metrow dołhi wotrězk statneje dróhi S 141 jězdnju ponowić. Dźěła budu w nowembrje zakónčene a płaća něhdźe 400 000 eurow. Wodowe Hendrichecy pře­wozmu z toho 11 000 eurow.

Z lětnym lisćikom lutować

Krótkopowěsće (07.07.15)

wutora, 07. julija 2015 spisane wot:

Při poskitkach lutować

Budyšin. Z nowej kartu móža hosćo we łužiskej jězorinje při wjace hač 50 turistiskich poskitkach lutować. Turisća móža sej lisćik za tři abo sydom dnjow kupić a dóstanu za to rabaty w muzejach, hosćencach, při dožiwjenskich turach, na čołmowanju a druhdźe. Za to bě so turistiski zwjazk loni tež wopyto­warjow za jich přećemi prašał.

Liberecska tradicija w Alpach

Liberec. Wustajeńcu wo njewšědnej atrakciji přihotuja tuchwilu w čěskim Liberecu:­ 600 kilometrow wottam steji w awstriskich Tauernskich Alpach 2 586 metrow wysoko „nowa Reichenbergska chata“. Jeje pomjenowanje, wuchadźace z němskeho mjena za Liberec, pak njeje připad. Chatu běchu w lěće 1926 wyso­kohórscy turisća z Libereca natwarili a ze symbolemi města wudebili.

Njewjedra hroža

Lipsk. Po dźensnišim horcym dnju hroža we wječornych hodźinach njewjedra. Tež Sakska je potrjechena, kaž Němska wjedrarnja w Lipsku warnuje. Ličić ma so z dešćom, krupami a wichorom, kotryž móže sylnosć hač do 115 km/h docpěć. Štwórtk drje budźe z runje 20 stopnjemi najchłódniši dźeń tydźenja.

Krótkopowěsće (06.07.15)

póndźela, 06. julija 2015 spisane wot:

Lětnja šula wotprajena

Lipsk. Serbska lětnja šula lětsa wupadnje. Tole zdźěla prof. dr. Edward Wornar z Instituta za sorabistiku Lipšćanskeje uniwersity. Dotal je so jedna jenička woso­ba přizjewiła. „Tohodla smy nětko wobzamkli, zo lětnju šulu wotprajimy“, wón piše. Připrajenu pomoc z Čěskeje za klě­tušu lětnju šulu chcedźa za přihot noweho kursa wužić.

Hilbert nowy měšćanosta

Drježdźany. Politikar FDP Dirk Hilbert je nowy wyši měšćanosta Drježdźan. Wón přesadźi so we wčerawšim druhim kole wólbow z 54,2 procentomaj přećiwo sakskej ministerce za wědomosć Evje­Mariji Stange (SPD), kotraž dósta 44 proc. ­hłosow. Na wólbach wobdźěli so 42,7 proc. ludźi. Hilbert bě kandidat towarstwa Njewotwisni wobydlerjo.

Wobsah žiwidłow rozdźělny

Praha. Wobsah tyzow žiwidłow ze sams­nym mjenom móže w Němskej a Čěskej rozdźělny być. Tole su čěscy posudźowarjo wuslědźili. Woni zwěsćichu tajki zjaw w cyłkownje 24 padach. Tak je jogurt Ac­tiv­ia w Němskej tučniši. Porno tomu je kwalita mjasa w konserwach w Němskej lěpša hač w Čěskej. Firmy wopodstatnjeja to z rozdźělnymi słodami w krajach.

Krótkopowěsće (03.07.15)

pjatk, 03. julija 2015 spisane wot:

Nětko online rešeršować

Budyšin. Archiwowane kubła města Budyšina hodźa so nětko online rešeršować. To zmóžnja nowe perspektiwy, přeslědźić regionalne stawizny. Něhdźe dwě třećinje cyłeho wobstatka stej online přistupnej. W Budyskim statnym archiwje chowa so 2,7 regionalnych kilometrow aktow, 1 500 wopismow a 6 600 kartow z minjenych sydom lětstotkow.

Folklorna lawina zahajena

Choćebuz. Mjeztym 15. folklorna lawina je so dźensa w Delnjej Łužicy zahajiła. Sta wobdźělnikow ćehnješe we wulkej paradźe po Choćebuzu. Přizjewiło bě so 400 hudźbnikow a rejwarjow z 13 krajow, kaž zarjadowarjo zdźěleja. Staciji lětu­šeho festiwala stej nimo Choćebuza tež Baršć a Lubnjow. Folklorna lawina traje hač do njedźele, 5. julija.

Planowanje projekta běži

Zhorjelc. Přihoty za znowawotewrjenje Zhorjelskeje kupnicy derje postupuja. Tuchwilu dźěła skupina projektoweho nawody Jürgena Friedela na planowanju dowolnosćow. Paralelnje k tomu wjedu rozmołwy z móžnymi wotnajerjemi. W domje budźe luksus runje tak zaměstnjeny kaž kupjomne wěcy. Nazymu 2017 chcedźa kupnicu wotewrěć.

nawěšk

nowostki LND