Wosebje w prěnim połčasu partije FC Energija přećiwo FC Hornjej Łužicy (FCO) bě wón najnapadniši akter hóstnych koparjow z Neugersdorfa. Před hłownej tribunu staraše so Denny Kral přeco zaso z dalokimi zamjetami wo njeměr w šěsnatce domjacych. Po partiji je Georg Zielonkowski z koparjom porěčał, kiž bě za FCO na lěwym křidle zasadźeny.
Dennyjo, z kotrymi zaćišćemi dźensa Choćebuz wopušćiće?
D. Kral: Bohužel smy hru 1:3 přěhrali. Za mnje bě to přiwšěm cyle wosebite začuće, w tajkej wulkotnej atmosferje před 4 000 ludźimi hrać. Do našeho stadiona wšak přińdźe jeničce 600 hosći. Dźensa bě to něšto wosebiteho.
Sće tu w Stadionje přećelstwa prěni raz na trawniku stał. Do toho, tak zhonich, sće tu přihladowar był?
D. Kral: To trjechi. Běch tu hižo dwójce, trójce přihladowar. Hdyž mam w našim regionje móžnosć, sej wyšoklasowu kopańcu wobhladać, na hry tež jědu. Wobkedźbuju Energiju a so za nju tež wosebje zajimuju.
Kak je so Wam FCE dźensa lubił? Hdyž móžeće to docyła sami hódnoćić, wšako sće sobu hrał?