Druhi serbski supercup w Njebjelčicach
Po lońšej premjerje přichwatachu wčera ze SJ Chrósćicy, Sokołom Ralbicy/Hórki, ST 1922 Radwor a ST Marijinej hwězdu znowa štyri serbske koparske cyłki do Njebjelčanskeho stadiona. Domjacy sami so na turněrje njewobdźělichu, dokelž běchu loni poslednje městno wobsadźili. Najebać tužne wjedro witaše Sportowa jednotka Njebjelčicy, kotraž turněr wuhotowaše, tójšto přihladowarjow. Woni widźachu mjez druhim tuchwilnu formu cyłkow a kopicu nowopřichadow, kiž w kóždym mustwje sobu kopachu.
W prěnim połfinalu měrjachu najprjedy Chróšćenjo a Radworčenjo swoje mocy. Sčasom přewza faworit z Chrósćic, kotryž hraje w krajnej klasy, komando a doby hru suwerenje z 2:0. Wosebje čěski nowopřichad Jakub Beneš, kiž docpě tež nawjedowanje, tu pozitiwnje napadny. Radworčenjo spytachu z konterami abo přez standardy k wuspěchej dóńć, tola defensiwa SJC steješe derje a tuž docpě zakitowar pokala tež wčera zaso jako prěni finale.