Podstupim (dpa/SN). Koronapandemija je tež w Braniborskej tójšto studowacych do eksistencneje financneje krizy storhnyła. „Lětni semester bě jedna z najwjetšich kubłansko-financnopolitiskich katastrofow minjenych lětdźesatkow“, zdźěli rěčnik braniborskich studentskich zastupnistwow Jonathan Wiegers wčera w Podstupimje. Tak nima wjele studentow žane dźěło wjace w typiskimaj wobłukomaj gastronomija a zarjadowanja. „Po wšej Němskej je milion studentow koronawirusa dla swoje pódlanske dźěło zhubił a dyrbješe tohodla studij přetorhnyć abo skónčić“, Wiegers zwěsća. Dokładne ličby hišće njepředleža. „Hakle nazymu widźimy, kelko studowacych so na zymski semester wróći.“