Minjenu srjedu nawječor pozasta tak mjenowany DFB-mobil w Ralbičanskim Stadionje přećelstwa. Němski koparski zwjazk (DFB) bě projekt hižo před lětami załožił, zo by hłownje kopańcu juniorow w amaterskich towarstwach podpěrał. Tak přewzaštaj dwaj trenarjej DFBja połdrahodźinski trening młodźiny E Sokoła Ralbicy/Hórki a staj domoródnych trenarjow sobu zapřijałoj. Tež dalši nazwučowarjo wokolnych towarstwow, kaž z Njebjelčic a Pančic-Kukowa, běchu přitomni, zo bychu sej wosebity trening z wosom małymi wrotami wobhladali. Wot sezony 2024/2025 budu dźě E- kaž tež F-juniorojo tak mjenowanu „funino“-kopańcu hrać. To rěka, zo budźe polo hišće raz skrótšene a wrota pomjeńšene. Tež hrajerjow jednotliwych mustwow budźe mjenje. Kak hodźi so tale forma kopańcy wuwučować, to staj trenarjej nětko po­kazałoj.