Bičwolejbulisća 7. do 9. lětnika Serbskeho gymnazija Budyšin (SGB) dobychu w Sprjewinej kupjeli wuchodosakske finale we wurisanju „Młodźina trenuje za olympiju“. Sportowče a sportowcy SWŠ Worklecy mytowachu so z bronzu mjez štyrjomi startowacymi šulemi.

Při chłódnych temperaturach wokoło 10 stopjenjow wotmě so minjenu srjedu w Sprjewinej kupjeli w Budyšinje kónčne regionalne koło starobneje skupiny III w bičwolejbulu. Šulerki a šulerjo SGB z kapitanom Karlom Krječmarjom nastupichu přećiwo dalšim třom šulam wuchodneje Sakskeje, zo bychu swojeho dobyćerja a kwalifikanta za krajne finale zwěsćili. Hakle w poslednjej hrě dnja mjez mustwomaj Serbskeje wyšej šule „Michał Hórnik“ Worklecy a Christiana Weisowemu gymnazijej Žitawa padny snadny rozsud k lěpšinje SGB.