SJ Njebjelčicy –
HZ Arnsdorf II /Großharthau 1:2 (0:1)
Zestawa domjacych: Hahn – Hanuza, Matješk (45. Kral D., 50. Reineke), Hrjehor, Čornak, Kral M., Rudolf, Bjeńš, Korjeńk, Domš F., Lehmann (45. Šiman)
Po dwěmaj dobyćomaj w lize slědowaše w zašłej domjacej hrě poražka přećiwo hrajnemu zjednoćenstwu Arnsdorf/Großharthau. Hosćo, kiž běchu do toho hišće bjez dypkow, hosćićelow překwapichu a dobychu hru 2:1.
W minjenych hrach ležeše róla faworita tendencielnje skerje pola Njebjelčanow. Ale tež změny stafle dla njemóžeše so přećiwnik tak prawje posudźować. Čerwjene košle njepokazachu tutu njedźelu dobry mustwowy wukon a žanu dobyćersku wolu. Wšitke te atributy, kotrež w zašłych hrach k dobyćam dopomhachu, na tutym dnju pobrachowachu. Z přećiwnikom na jednej runinje sobu dźeržeć by móžne było. Wužiwanje šansow pak bě chětro špatne. Nimo toho přeprošachu Njebjelčenjo přećiwnika prawidłownje před swójske wrota. Tak hosćo wot 26. min. 1:0 nawjedowachu. Wo małe swětleško postara so Stefan Bjeńš. Sernjančan docpě w druhej połojcy wurunanje 1:1 (69). Při tym pak bohužel njewosta.
