Wolejbulistki prěnjeho zastupnistwa Viktorije Worklecy su so za finale wobwodneho pokala kwalifikowali. Mustwo TSV Kundračicy bě ze zašłosće derje znaty kontrahent. Finalne koło wuhrachu w Zhorjelcu.

TSV Kundračicy – Viktoria Worklecy

1:2 (27:25, 25:27, 7:15)

Z kónčneho dypkoweho stawa da so hižo wučitać, zo běštej prěnjej sadźbje jara napjatej. Na spočatku prěnjeho přechoda dominowachu Kundračanki. Sylna serija nadaćow wobradźi jim sydom dypkow a z tym jasny předskok. Tutón nachwatachu Worklečanki krok po kroku mjez druhim z wariabelnymi nadběhami a přez wonkownu abo diagonalnu poziciju. Při wurunanju 10:10 prošachu hosćićelki wo přetorhnjenje, tola to Worklečanki z rytmusa njepřinjese. Njemylene wudobychu sej dalše dypki, tak zo stajichu Kundračanki poměrnje spěšnje při stawje 16:11 swoju druhu próstwu wo krótku přestawku. Ta pak pokaza swoju skutkownosć, wšako so jim poradźi, wurunanje docpěć. Slědowaše faza, w kotrejž wobě mustwje dypkowaštej. Naposledk pak so přećiwnicy z 25:27 přesadźichu.