Maas na městnje katastrofy
Beirut/Berlin (dpa/SN). Dobry tydźeń po zahubnym rozbuchnjenju amonijoweho nitrata w Beirutskim přistawje je zwjazkowy wonkowny minister Heiko Maas (SPD) městno katastrofy wopytał. Na dźeń trajacym wopyće w stolicy Libanona chcyše wón ze zamołwitymi wo hospodarskej pomocy rěčeć a so zdobom za hłuboko sahace reformy w kraju zasadźeć. Němska je dotal 20 milionow eurow pomocy přilubiła. Hoberska detonacija wčera tydźenja bě sej 165 mortwych a 6 000 zranjenych žadała.
Ličby korony přiběrace
Berlin (dpa/SN). Ličba wšědnje wozjewjenych nowych natyknjenjow z koronawirusom w Němskej je najwjetša wot spočatka meje docpěła. Strowotniske zarjadnistwa su Roberta Kochowemu institutej wčera 1 226 padow w běhu dnja zdźělili. Wjetša bě ličba naposledk jeno 9. meje z 1 251 nowoinfekcijemi. Ličba je strowotniskemu ministrej Jensej Spahnej (CDU) „přičina so starosćić“. Jemu je to dopokaz, zo su ludźo we wobchadźenju z wirusom dale a lochkomyslniši.
Do šule z nahubnikom
Tójšto dźěła mějachu wohnjowi wobornicy wčera w srjedźnej ...
Afroameričanka powołana
Washington (dpa/SN). Přichodny kandidat demokratow USA za zastojnstwo prezidenta Joe Biden je w padźe wólbneho dobyća Kamalu Harris za wiceprezidentku kraja powołał. To zdźěli wón wčera we Washingtonje. 55lětna senatorka by tak prěnja afroameriska wiceprezidentka była. Dźowka zapućowarjow z Jamaiki a Indiskeje zwurazni, zo ma za wulku česć, zhromadnje z Joewom Bidenom w nowembru přećiwo prezidentej Donaldej Trumpej nastupić směć. Bywši prezident Barack Obama rozsud Bidena za Harris za wiceprezidentku wuraznje wita. „To je dobry dźeń za naš kraj.“
Prezident Trump porno tomu reagowaše překwapjeny na powołanje Kamale Harris. Wón jej wumjetuje, zo je we wólbnym boju demokratow lózysce a bjez respekta přećiwo Bidenej wustupowała.
Nowe protesty
Rozdźělne reakcije na ruski serum
Kopenhagen/Moskwa (dpa/SN). Swětowa strowotniska organizacija (WHO) je zdźeržliwje na wot ruskeho prezidenta Wladimira Putina wozjewjene přizwolenje noweho seruma přećiwo koronawirusej reagowała. WHO wita zasadnje wšitke napinanja k wuwiću šćěpiwa přećiwo wirusej, zdźěli regionalny běrow na naprašowanje powěsćernje dpa. Zdobom běrow na to skedźbnja, zo je wuwiće seruma na krute směrnicy wjazane, wosebje hladajo na dołhodobne pruwowanje.
Putin bě wčera zdźělił, zo je po wšěm swěće prěni serum přećiwo koronawirusej Sputnik V wuwity a zasadźomny. Dotal njepředleža žane mjezynarodne kliniske přepytowanja wo skutkownosći šćěpiwa, štož je poprawom z wašnjom.
Brazilski južny zwjazkowy stat Paraná je mjeztym zajim za nowy ruski serum signalizował. Nětko prócuja so tam wo zrěčenje z Ruskej, zo móhli serum přećiwo koronawirusej sami produkować. Zrěčenje chcychu hišće dźensa podpisać.
To a tamne (12.08.20)
Z ruku w cigaretowym awtomaće tčacy wostał je muž w sewjerorynsko-westfalskim Mönchengladbachu. Wohnjowi wobornicy jeho skónčnje z wulkimi klěšćemi wuswobodźichu, po tym zo běchu to sobudźěłaćerjo kupnicy podarmo spytali. Muž wosta njezranjeny a móžeše po lěkarskim přepytowanju dale nakupować.
Nawoči indiskeho wojowarja wo swobodu Mahatmy Gandhija chcedźa we Wulkej Britaniskej přesadźować. Stoprocentowsce wěsći sej w Bristolskim awkciskim domje East Auctions přiwšěm njejsu, zo su nawoči Gandhijej (1869–1948) woprawdźe słušeli. Awkcionator pak ma dosć pokazkow na to, kaž su to přirunajomne modele, kotrež bě Gandhi swój čas wužiwał. Internetnje chcedźa je 21. awgusta přesadźować. Hódnotu trochuja na 17 000 eurow. Mnozy zajimcy su so hižo přizjewili.
Knježerstwo wotstupiło
Beirut (dpa/SN). Po zahubnym rozbuchnjenju w přistawje libanonskeje stolicy Beiruta je ministerski prezident Hassan Diab wotstup cyłeho knježerstwa připowědźił. W telewizijnej narěči šwikaše Diab daloko rozšěrjenu korupciju w kraju, kotraž je w jeho wočomaj sobu wina na hoberskej detonaciji. Mjeztym bu znate, zo běchu fachowcy knježerstwo w lisće hižo 20. julija před rozbuchom warnowali, wuzběhujo w přistawje składowanych 2 750 tonow amonijoweho nitrata.
Trump konferencu wopušćił
Washington (dpa/SN). Wutřělow před Běłym domom dla je prezident USA Donald Trump nowinarsku konferencu na někotre mjeńšiny wopušćił. Sobudźěłaćer wěstotneje słužby wjedźeše jeho ze žurle, kaž w telewiziji pokazachu. „Před Běłym domom su třěleli“, Trump rjekny. Wěstotne mocy třělachu na muža, kiž bě so wobrónjeny płotej Běłeho domu bližił. Jeho dowjezechu do chorownje. Kak so jemu dźe, njeje znate.
Strach lěsnych wohenjow wulki
Po zahubnym wohenju w čěskim Bohumínje sewjernje Ostravy žaruja ...
Maas na wopyće w Moskwje
Berlin (dpa/SN). Konfliktaj na Ukrainje a w Libyskej stejitej w srjedźišću dźensnišeho wopyta zwjazkoweho wonkowneho ministra Heika Maasa (SPD) w Ruskej. Dalšej temje zetkanja z ruskim wonkownym ministrow Sergejom Lawrowom w Moskwje stej wobchadźenje z Iranom a zhromadne dźěło z Ruskej w Bjezstrašnostnej radźe UNO. Energijowe zastaranje Němskeje a zapadneje Europy a najnowše hroženja USA přećiwo zamołwitym přistawa w Sassnitzu-Mukranje, hdźež składuja roły za nowy płunowód Nord Stream 2, chcyštaj politikarjej tohorunja rozjimać. Społnomócnjeny zwjazkoweho knježerstwa za styki k Ruskej Dirk Wiese (SPD) je sej dźensa w rańšim magacinje sćelaka ZDF tajke hroženja zakazał.
Po krótkowopyće w Moskwje pojědźe Maas dale do Pětrohrodu, hdźež wotměja so wopomnjenske zarjadowanja za wopory blokady města w Druhej swětowej wójnje. Tehdy zahiny wjace hač milion ludźi, dokelž je němska Wehrmachta Pětrohród wuhłódnić dała.
Tichanowskaja Běłorusku wopušćiła
Minsk (dpa/SN). Po prezidentskich wólbach w Běłoruskej je kandidatka opozicije Swjetlana Tichanowskaja kraj wopušćiła a přebywa w čłonskim kraju EU Litawskej. 37lětna je nětko wěsta, zdźěli litawski wonkowny minister Linas Linkevicius w interneće. Minister bě wčera wječor swoje starosće hladajo na namóc w Běłoruskej a na wěstotu maćerje dweju dźěsći zwuraznił. Tichanowskaja bě njedźelu na nowinarskej konferency rjekła, zo chcyła w kraju wostać a zo ma so za dobyćerku njedźelnych prezidentskich wólbow. Wona pak čuješe so masiwnje wohrožena, předewšěm wot wěstotnych mocow awtoritarneho prezidenta Aleksandera Lukašenka. 65lětny bě hrozył wójsko zasadźić, zo by swoju móc po 26 lětach za dalšu dobu zaručił.
W Běłoruskej su tež wčera wječor přećiwo znowawuzwolenju Aleksandera Lukašenka protestowali. Při tym dóńdźe k zražkam mjez demonstrantami a policiju. W stolicy Minsku je jedyn demonstrant pod dotal njewujasnjenymi wobstejnosćemi žiwjenje přisadźił.
