Drježdźany (dpa/SN). Po třoch lětach je Drježdźansko-Mišnjanske biskopstwo najwjetši dźěl swojeje strukturneje reformy wotzamknyło. „W septembrje chcemy hišće nowu wosadu w Zwickauwje załožić. Potom zwostanje jenož hišće serbska kónčina, wo kotrejž njejsmy dotal hišće rozsudźili“, rjekny tudyši biskop Heinrich Timmerevers powěsćerni dpa w Drježdźanach. Najebać to chcedźa přestrukturowanje wosadow hač do kónca septembra zmištrować.
Berlin (dpa/SN). Prěni króć po třoch měsacach je Roberta Kochowy institut wjace hač tysac natyknjenych z koronawirusom registrował. Strowotniske zarjadnistwa w Němskej su po informacijach instituta cyłkownje 1 045 padow w běhu dnja přizjewili. Hranicu tysac nowych padow běchu naposledk 7. meje překročili. Na to bě ličba woteběrała, wot julija pak zaso přiběrała. Wjeršk běchu spočatk apryla ze 6 000 infekcijemi docpěli.
Starosće fachowcam načinja, zo njewudyrja infekcije na wěstych městnach, kaž w rězarni Tönnies, ale zo so znowa po wšěm kraju rozpřestrěwaja.
Hłowna přičina přiběracych ličbow je we wočomaj prezidenta Roberta Kochoweho instituta Lothara Wielera přiběraca zwjeršnosć ludźi při dodźerženju škitnych naprawow přećiwo wirusej.
Nětko chcedźa dokładnje wobkedźbować, kak so započatk šule w někotrych zwjazkowych krajach na ličby infekcijow wuskutkuje. Dźensa je so w Hamburgu za 240 000 šulerjow zaso wučba započała.
Beirut (dpa/SN). Po zahubnym rozbuchnjenju amonijoweho nitrata w Beiruće z wjace hač 130 mortwymi a 5 000 zranjenymi pytaja tam dale za woporami a předewšěm za přičinami katastrofy. Přepytowanska komisija ma knježerstwu w běhu pjeć dnjow rozprawu předpołožić. Wjacorych zamołwitych přistawa su do domjaceho aresta tyknyli. Po dotalnych dopóznaćach je 2 750 tonow strašneje maćizny rozbuchnyło, kotraž bě bjez wěstotnych naprawow hižo wjacore lěta w jednej z halow přistawa składowana.
Katastrofa je mjezynarodnu žołmu pomocy zbudźiła. Hišće wčera wječor nastaji so skupina specialistow Němskeho čerwjeneho křiža z wosebje wukubłanymi psami na puć do libanonskeje stolicy. Tež Čěska pósła pomocny team wohnjoweje wobory, kotryž je na wuchowanje zasypanych specializowany. Woni maja tohorunja psy sobu. W běhu dnja wočakowachu w Beiruće pomocne mustwa z wjacorych krajow.
Kóčku při pašowanju drogow lepili su zastojnicy w jastwje stolicy Sri Lanki Colombo. Sobudźěłaćerjam bě podhladny pakćik napadnył, kotryž měješe kóčka wokoło šije. W nim namakachu heroin a SIM-kartki za mobilne telefony. Nětko chcedźa zwěsćić, hač je kóčka hižo časćišo jako kurěr w jastwje była. Mjeztym su tež wěstotne naprawy zesylnili.
15 eurow pokuty płaćić dyrbješe Gloria wjerchowka von Thurn und Taxis, dokelž bě bjez nahłownika na elektriskim roleru na pohrjeb Georga Ratzingera w Regensburgu přijěła. Kaž rěčnica policije zdźěli, su pjenjezy mjeztym dóšli. Policija bě 60lětnej chłostanku pósłała, po tym zo bě wona 8. julija bjez nahłownika k Regensburgskej katedrali přijěła a swój elektroroler demonstratiwnje před tam stejacymi policistami wotstajiła.
Drježdźany (SN/CoR). Z 30 milionami eurow chce Swobodny stat Sakska młodych kreatiwnych předewzaćelow podpěrać. Wobmjezowanjow koronakrizy dla maja mnohe runje załožene projekty a firmy ćeže z pjenjezami. Nowy pomocny fonds přewostaji tak mjenowanym startowacym předewzaćam w Sakskej 30 milionow eurow. Na financowanju wobdźěla so Zwjazk, Swobodny stat Sakska a srjedźostawska wobdźělenska towaršnosć (MBG) Sakskeje.
Hač do kónca lěta móža młodźi załožerjo firmow Drježdźanskej MBG próstwu zapodać. Fonds zaruča za zawěsćenje likwidity swójski kapital hač do 800 000 eurow. „Su to młode předewzaća, kotrež z inowatiwnymi modelemi naše hospodarstwo modernizuja. Chcemy wobeńć, zo płódne ideje financowanja dla zwrěšća“, podšmórny wčera sakski minister za hospodarstwo a dźěło Martin Dulig (SPD). Wotmołwy na swoje prašenja dóstanu zajimcy na internetnym forumje Online-Q&A, kotryž inowaciska platforma futureSAX dźensa wot 17 hodź. přewjedźe. Přizjewjenja pod www.futuresax.de/corona-startup-hilffonds
Berlin (dpa/SN). Sewjerorynsko-Westfalska chce sej ranjenja předpisa nastupajo wužiwanje nahubnika w busu a železnicy dla hnydomnu pokutu 150 eurow žadać. To je tamniši wobchadny minister Hendrik Wüst (CDU) připowědźił. Dotal su sej pokutu hakle žadali, hdyž potrjecheni tež po wospjetnym napominanju škit za hubu a nós njewužiwachu. „Žane dołhe diskusije wjace. Dźe wo solidaritu z najsłabšimi w našej towaršnosći“, minister Wüst raznje podšmórny.
FDP skorži připłatka dla
Berlin (dpa/SN). Direktnje po parlamentariskej lětnjej přestawce spočatk septembra chcedźa čłonojo frakcije FDP w zwjazkowym sejmje na Zwjazkowym wustawowym sudnistwje skóržbu přećiwo solidaritnemu připłatkej zapodać. To rjekny městopředsyda frakcije Christian Dürr powěsćerni dpa. Wjacore posudki fachowcow běchu wunjesli, zo zběranje přinoška po decembru 2019 wustawu rani. „Po skónčenju solidarneho pakta za natwar wuchoda bychu wot 1. januara 2020 soli wotstronić dyrbjeli.“
Witaja rozsud Němskeje
Beirut (dpa/SN). Po hoberskej detonaciji w stolicy Libanona Beiruće z wjace hač sto mortwymi a 4 000 zranjenymi pytaja tam nětko za móžnymi přičinami. Dotal z toho wuchadźeja, zo je wulke mnóstwo eksploziwneho amonijoweho nitrata rozbuchnyło. Něhdźe 2 750 tonow strašneje substancy bě w jednej z halow Beirutskeho přistawa bjez wěstotnych naprawow składowanych, kaž ministerski prezident Hassan Diab zdźěli. Pokazki na politisce motiwowany atentat dotal žane njejsu. Jenož prezident USA Donald Trump je sej ze „swojimi generalemi“ wěsty, zo jednaše so wo „tajke něšto kaž bombu“.
Rozbuch je libanonsku stolicu, kotrejež wobydlerjo tuchwilu wulkeje politiskeje a hospodarskeje krizy dla ćerpja, do hišće wjetšeho chaosa storhnył. Střasenja dla buchu wokna rozbite, wšudźe su njesměrne škody widźomne. Krawjacy ludźo błudźachu po dróhach nutřkowneho města połneho rozwalinow, črjopow a procha. Wulke dźěle přistawa su dospołnje zničene. W Beiruće, hdźež bydla něhdźe 2,4 miliony ludźi, su dwutydźenski nuzowy staw wukazali.
Waršawa (dpa/SN). W Pólskej maja telko nowych natyknjenjow z koronawirusom kaž hišće ženje za čas pandemije. Wčera su tam zamołwići 680 nowoinfekcijow w běhu 24 hodźin registrowali, kaž strowotniske ministerstwo informuje. Dotalnu rekordnu ličbu 658 nowych padow běchu minjenu sobotu docpěli. Po oficialnych informacijach je so tam dotal 48 149 ludźi z wiruson natyknyło, 1 738 pacientow je na njón zemrěło.
Wirus so wočiwidnje tež mjez zapósłancami we Waršawje rozšěrja. Třoch čłonow senata, druheje komory parlamenta, su hižo pozitiwnje testowali. Posedźenja parlamenta su přestorčene. Přiwšěm chcedźa jutře planowane zapokazanje a spřisahanje prezidenta Andrzeja Dudy za druhu dobu zastojnstwa pod wěstotnymi naprawami přewjesć. Duda chce přisahu před narodnej zhromadźiznu złožić, kotraž wobsteji z wobeju komorow parlamenta.