Točenske dźěła zahajene
Deško (dpa/SN/ch). Dźensa su sewjernje Deška započeli twarnišćo za probowe točenje za koporom zarjadować. Pólska podkopkowa towaršnosć KGHM chce wobstatk kopora w zemi pruwować. Přećiwo tomu pak so wobydlerska iniciatiwa wobara. Boja so před zanjerodźenjom pitneje wody. Čłonojo iniciatiwy su dalše protestne akcije připowědźili. Točić budźe pak so jenož jónu, a to hač do hłubokosće něhdźe 700 metrow. Dźěra budźe 15 do 30 centimetrow šěroka. Někotre sta metrow wot předwidźaneje dźěry su hižo před 50 lětami za zemskimi pokładami pytali. Tehdyše přepytowanja pak njehodźa so wjace wužiwać.
Nowa wuchowanska straža
Berlin (dpa/SN/K). Spionažna afera z pozdatnym zhromadnym dźěłom mjez ameriskej NSA a němskim BND při wučušlowanju němskich koncernow kaž tež europskich politikarjow bywa prawdźepodobnje „sud próška“, kiž móhł wulku koaliciju rozdwojić. SPD žada sej dale a raznišo dospołne wuswětlenje brizantneje naležnosće, politikarjo unije třěleja wótrje wróćo.
W swojich spódnich cholowach je Polak sadźenki a symjo rostlin ze swojeje domizny do Neuseelandskeje pašować spytał. Na lětanišću w Aucklandźe pak jeho lepichu, po tym zo bě policajski pos reagował. W Neuseelandskej bydlacy muž chcyše rostliny w swojej zahrodźe sadźeć. Tole je pak tam kruće zakazane, dokelž móhli cuze rostliny domoródne wohrožować a nowe chorosće rozšěrjeć.
Tři metry wulku a 250 kilogramow ćežku postawu su fanojo Uda Lindenberga składnostnje 69. narodnin rockoweho spěwarja w jeho ródnym měsće Gronauwje nastajili. Postawa, symbolizowaca Lindenberga spěwajo na jewišću, steji wosrjedź kružneho wobchada njedaloko ródneho domu sławneho wuměłca. Na poswjećenje přińdźe 2 500 ludźi.
Přez sto padow boreliozy
Zły Komorow (dpa/SN). Wot spočatka lěta su w Braniborskej dotal přez sto padow boreliozy zwěsćili. Kaž strowotniske ministerstwo w Podstupimje zdźěli, přizjewichu wokrjesy a bjezwokrjesne města dotal 123 padow schorjenja. Lońše ličby k přirunanju njepředleža. Loni zwěsćichu w Braniborskej cyłkownje 1 548 padow boreliozy, něšto mjenje hač w lěće 2013. K wuwiću lětušich padow schorjenja njemóžeše so strowotniske ministerstwo wuprajić. Wuwiće wotwisuje wot wjedra. Najsylnišo potrjecheny je dotal wokrjes Dubja-Błóta z 19 padami. Bakterije boreliozy, kiž přenjesu klěšće, zawinuja zahorjenje zhibadłow a čuwow kaž tež muskulatury wutroby.
Póstownicy dale stawkuja