Z dwěmaj promilomaj na e-biku
Budyšin. W nocy na póndźelu je policajska patrulja w Budyšinje na Serbskich hrjebjach 17lětneho na e-biku lepiła, kiž měješe wjac hač dwaj promilej alkohola w kreji. Zastojnikaj młodostnemu dalejězbu nablaku zakazaštaj.
Wóslik na dróze
Mučow. Za Mučowom wuhladachu wčera rano šoferojo na B 96 wóslika a zdźělichu to policiji. Mjeztym dóšły plahowar je so wo skoćo dale starał.
Awto do kolesowarja zajěło
Hrańca. Njedźelu popołdnju je 22lětny wodźer Škody na S 101 pola Hrańcy do kolesowarja zajěł a jeho ćežko zranił. Šofer bě 63lětneho kolesowarja přesćahnył, jako chcyše tón runje dróhu přeprěčić.
Wobornicy lěsny woheń zhašeli
Čorny Chołmc. Lěs je so wčera dopołdnja při Petzerec hórce w Čornym Chołmcu na pjeć městnach a na cyłkownej přestrjeni něhdźe 8 000 kwadratnych metrow palił. 45 kameradow, mjez druhim z Wojerec, Čorneho Chołmca, Michałkow/Brětnje, Němcow kaž tež z Njedźichowa a Kulowa, kotřiž běchu wot 10 hodź. na městnje, měješe płomjenja něhdźe w 14.30 hodź. pod kontrolu. Tak móžachu hišće wjetšim škodam zadźěwać. Přičiny wohenja njejsu znate, čehoždla je fachowcy tuchwilu přepytuja.
Paduši w kupjeli
Kulow. Wospjet su so paduši do Kulowskeje kupjele zadobyli. Kaž dyrbjachu tam zawčerawšim zwěsćić, běchu njeznaći z kioska žiwidła a napoje w hódnoće 400 eurow pokradnyli. Nimo toho načinichu 500 eurow wěcneje škody.
Do latarnje a do murje zjěł
Radwor. Chětro natutkany bě wodźer transportera, kiž je zawčerawšim popołdnju w Radworju do latarnje a na to do murje zrazył. Při wobdźěłanju njezboža napadny policistam jeho chorhojčka. Pola 31lětneho zwěsćichu 2,14 promilow alkohola w kreji.
Z 222 km/h po awtodróze smalił
Budyšin. Při kontroli na awtodróze A 4 pola Budyšina lepichu zawčerawšim w běhu třoch hodźin 90 přespěšnych šoferow. Najnuznišo měješe wodźer awta, kiž je při dowolenych 120 kilometrow na hodźinu z 222 km/h nimo błyskača smalił. Wón ma nětko 600 eurow pokuty płaćić, dóstanje dwaj dypkaj w Flensburgu a njesmě štwórć lěta žane awto wodźić.
Grat z awtow kradnyli
Malećicy. Na awtach twarskich firmow składowany grat bě minjeny kónc tydźenja cil paduchow w Malećicach (Maltitz) pola Wósporka. Gratowe kašćiki skućićeljo namócnje wočinichu a pokradnychu z nich wšelake elektriske mašiny w cyłkownej hódnoće něhdźe 5 000 eurow. Nastatu wěcnu škodu na awtach trochuja na něhdźe 300 eurow, kaž Zhorjelska policajska direkcija zdźěli.
Padušnu cwólbu zajeli
Nadźanecy. Štyri wosoby wopřijacu padušnu cwólbu je policija minjeny pjatk w Nadźanecach (Nadelwitz) pola Budyšina zajała. Swědcy běchu do toho podhladne awto na parkowanišću kupnicy wobkedźbowali. Jako tam zastojnicy přijědźechu, zwěsćichu woni štyri wosoby, kotrež pod swojej drastu a w tobołach rubiznu z wokolnych wobchodow k awtu njesechu. Při tym jednaše so wo elektroniku a kosmetiku w hódnoće něhdźe 600 eurow. Někajku kupnu kwitowanku za to třo mužojo w starobje 31, 42 a 45 lět kaž tež 21lětna žona předpołožić njemóžachu. We wokolnych wobchodach so nimo toho podhlad wobkrući, zo tam pokradnjene wěcy pobrachowachu. Wšěch štyrjoch na to zajachu a awto za dalše přepytowanja sćazachu.
Pisany kwěćel deliktow
Budyšin. Zawčerawšim wječor je policija na Budyskej Stieberowej wosobowe awto typa Seat Ibiza kontrolowała a hnydom wjacore delikty zwěsćiła. Přičinjene čisło scyła k awtu njesłušeše. Nimo toho namakachu w jězdźidle dalše, zwjetša njepłaćiwe čisła, mjez druhim jedne pokradnjene. Kaž so dale wukopa, 28lětny šofer scyła žanu jězbnu dowolnosć njewobsedźeše a jeho awto ani přizjewjene ani zawěsćene njebě.
Dyrbitaj pokutu płaćić
Horni Wujězd. W padźe zatykaneje awtodróhi njesměš prosće nabóčne pasmo wužiwać, zo by spěšnišo doprědka přišoł. Tole wěstaj nětko šoferaj, kotrejuž je policija zawčerawšim pola Hornjeho Wujězda na A 4 při tym lepiła. Wonaj dyrbitaj nětko wobaj pokutu 90 eurow płaćić a dóstanjetaj dypk w Flensburgu.
Čołmik zaso namakali
Hamor. Hižo spočatk julija bě so při Hamorskim towarstwowym domje padlowanski čołmik zhubił. Tón wuhlada policajski zastojnik zawčerawšim w swojim wólnym času w zahrodce na Diesterwegowej w Hamoru poł zakryty pod planu. Hromadźe z wobsedźerjom sej policisća tam dojědźechu a zwěsćichu, zo jedna so wo pokradnjeny čołmik. Štó bě jón wotwjezł dyrbja nětko wuslědźić.