Policija (21.11.17)
Kwady kradnyli
Sepicy. Po wšěm zdaću chětro kamjenjaty puć domoj mějachu njeznaći paduši w Sepicach. Z hale na Drježdźanskej pokradnychu w času wot minjeneje soboty popołdnja do njedźele připołdnja wjacore kwady. Kaž policija zdźěla, je wobsedźer zwěsćił, zo pobrachuja nimo štyrjoch dźěćacych dalši sportowy kwad, wjacore crossowe nahłowniki kaž tež grat a narunanske dźěle. Škoda wučinja něhdźe 15 000 eurow.
Policija (20.11.17)
Dróhi hładke byli
Wóslink. Na wjacorych městnach su so sobotu rano na hładkich pućach wobchadne njezboža stali. Pola Wóslinka bě 53lětny wodźer Renaulta krótko po wosmich na statnej dróze S 95 kontrolu nad swojim wozydłom zhubił. Renault zajědźe na lěwy bok jězdnje a so wjacore razy zwróći. Muž so při tym ćežko zrani, tak zo dyrbjachu jeho z helikopterom do chorownje dowjezć. Awto so dospołnje skóncowa. Wobdźěłanja njezboža a rumowanja dla je na statnej dróze k poćežowanjam wobchada dóšło.
Policija (17.11.17)
Zražka na křižowanišću
Bolborcy. K njelubemu zetkanju dweju wosoboweju awtow je zawčerawšim popołdnju na křižowanišću w Bolborcach dóšło. 71lětna wodźerka Audija bě tam ze Smochčanskeho směra přijěła a po wšěm zdaću předjězbu 55lětneje šoferki Opela njewobkedźbowała. Zražka bě tak mócna, zo so Opel z jězdnje suny a do sćěny domskeho prasny. Na twarjenju nasta něhdźe 10 000 eurow škody. Wobě žonje so snadnje zraništej. Na jeju jězdźidłomaj nasta dohromady dalšich 10 000 eurow wěcneje škody. Wobškodźene twarjenje dyrbješe statikar přepruwować. Wo wuslědku jeho posudka dotal ničo znate njeje.
Policija (16.11.17)
Do pincy so zadobyli
Wojerecy. W nocy na wutoru zadobychu so njeznaći do pincy wjaceswójbneho domu na Wojerowskej Einsteinowej. Po tym zo běchu durje namócnje wočinili, pokradnychu 63lětnemu wobydlerjej kašćikaj piwa. Při dalšej pincy samsneho domu zwrěšćichu na durjach.
Policija (15.11.17)
Dóstanje najwyše chłostanje
Lěskej. Při kontroli spěšnosće zawčerawšim popołdnju na zwjazkowej dróze B 156 w Lěskej lepichu Mercedes, kotryž ze 124 km/h přez wjes smaleše. Na jeho wodźerja čaka nětko najwyše móžne chłostanje za wobchadne delikty: tři měsacy zakaz jězdźenja, pokuta 680 eurow a dwaj dypkaj w Flensburgu.
Policija (14.11.17)
Nakładne awto so zwróćiło
Dobrošecy. Swoju jězbu z wulkim nakładnym awtom wčera na statnej dróze S 109 je sej jeho šofer zawěsće hinak předstajił. Krótko po 11 hodź. zajědźe wón přejara na kromu puća, suny so z jězdźidłom do přirowa a so zwróći. Nakładowane 22 tonow třěšnych cyhelow wusypny so na polo. Nimo toho so Lkw chětro wobškodźi a dźěl diesela z njeho wuběža. Nakładne awto a třěšne cyhele rumować je hač do wječornych hodźin trało.
Policija (13.11.17)
Limonada a piwo fuk
Budyšin. Po wšěm zdaću lačni běchu paduši, kotřiž zadobychu so na Budyskej Einsteinowej do pincy bydlenskeho domu. Tam pokradnychu kašćik limonady a kašćik piwa. Škodu trochuje mějićelka na něhdźe 13 eurow.
Policija (10.11.17)
Njeprošeny wopyt w kinje
Budyšin. Nad wjele ludźimi w Budyskim kinje so hewak wjesela, w nocy na minjenu srjedu pak nic. Njeznaći běchu so tam zadobyli a wšitke rumnosće přepytali. Trezor wšak namakali njejsu. Kelko wěcneje škody je při tym nastało, njeje hišće dokładnje znate.
Policija (09.11.17)
Pytaja wobškodźene awto
Kamjenc. Nic skućićela, ale škodowaneho pyta policija w Kamjencu. Na tamnišim parkowanišću při Lessingowym parku bě 67lětna žona ze swojim Seatom do cuzeho awta prasnyła. Rentnarka městno njezboža skrótka wopušći, ale so bórze na to nawróći, zo by škodu zrjadowała. Cuze awto pak bě mjeztym wotjěło, na čož 67lětna policiju informowaše. Ta pyta nětko na prawym boku wobškodźene wosobowe awto. Pokiwy přijimuje Kamjenski policajski rewěr pod telefonowym čisłom 03578/ 35 20.
Policija (08.11.17)
Sam sebje zranił
Bjerwałd. Po swójbnym rozestajenju je 33lětny muž zawčerawšim popołdnju w Bjerwałdźe tež policiju zaběrał. Zazwoni nuzowe čisło a prašeše so za lěkarjom. Jako wobsadka policajskeho awta tam přijědźe, pokaza wón zastojnikam sekeru kaž tež trašawku a so nadobo z nožom sam zrani. Jeno z pomocu popjerjoweho sprayja móžachu jeho přewinyć. Při alkomatowym tesće naměrichu pola njeho 4,18 promilow alkohola w kreji. Lěkarsku pomoc pak muž wotpokaza.
