Policija (12.09.16)
Kolesowar so zranił
Chrósćicy. Při wšěch zranjenjach hišće zbožo měł je 34lětny muž sobotu rano w Chrósćicach. Kolesowar bě krótko do 9 hodź. ze swojim psom na Hórnikowej po puću, jako z dotal njeznateje přičiny balansu zhubi a padny. Runje w tym wokomiku jědźeše tam wosobowe awto typa Seat nimo. Do njeho muž z hłowu dyri, tak zo dyrbjachu jeho do chorownje dowjezć. By-li awto muža přejěło, by njezbožo zawěsće hórje wušło.
Policija (09.09.16)
Na runym puću znjezbožiłoj
Biskopicy. Frontalnje do so zrazyłoj stej dźensa rano na statnej dróze S 111 pola Biskopic do směra na Budyšin wosobowej awće typa Škoda a Alfa Romeo. Wobaj šoferaj so ćežko zraništaj. Přičina zražki na runym puću njeje znata.
Policija (08.09.16)
Nowy trik bohužel fungował
Zhorjelc. Njeznaći su Zhorjelskej rentnarce pjećcyfrowu sumu pjenjez wulišćili. Najprjedy zazwoni pola njeje muž, wuda so jako wnučk a prošeše wo pjenjezy. Na to zazwoni žona, wuda so jako policistka a powědaše, zo je muža z tamneho telefonata wuslědźiła. Nětko by žadanu sumu pjenjez za napodobnjenje přepodaća trjebała. A rentnarka jej pjenjezy přepoda.
Policija (07.09.16)
Awtomat rozbuchnyli
Wojerecy. Dokelž bu wot wulkeje hary ze spara torhnjena, je wobydlerka Wojerowskeje Cyrkwinskeje hasy w nocy na wutoru policiju wołała. Zastojnicy na to zwěsćichu, zo bě něchtó w bliskosći cigaretowy awtomat wobškodźił. Njeznaći běchu jón ze silwesterskimi praskotakami rozbuchnyli. Najskerje pak měrjachu so jeničce na cigarety, přetož kasetu z pjenjezami sobu wzali njejsu.
Płunowe bleše pokradnjene byli
Wojerecy. Wjacore płunowe bleše chcyše zawčerawšim wječor 34lětny muž we Wojerowskej tankowni wotedać a za nje zastawny pjenjez měć. Jako wón wonka płunowe bleše wočini, zo by je wuprózdnił, bě to sobudźěłaćerce podhladne. Přiwołani policisća zwěsćichu, zo awto muža přizjewjene njebě, tež awtowej čisle k awtu njesłušeštej. Rottweileraj w jězdźidle dźěło policije poćežowaštej. Přiwšěm zastojnicy awto kaž tež po wšěm zdaću pokradnjene płunowe bleše sćazachu.
Policija (06.09.16)
Kolesowarka smjertnje znjezbožiła
Budyšin. Tragiski wukónc měješe wobchadne njezbožo wčera připołdnju na Budyskim křižowanišću Lubijska/Walska. 60lětna kolesowarka chcyše tam při zelenej ampli Lubijsku dróhu přeprěčić, jako 70lětna wodźerka Suzukija z Walskeje přijědźe a naprawo na Lubijsku wotboči. Při tym njewobkedźbowaše wona kolesowarku a zrazy do njeje. 60lětna tak njezbožownje padny, zo runje na kromu chódnika dyri a so tak ćežko zrani, zo hišće na městnje njezboža wudycha. Wobchadna njezbožowa słužba Zhorjelskeje policajskeje direkcije tónle pad nětko přepytuje.
Policija (05.09.16)
W křiwicy do so zrazyłoj
Łazk. Třo zranjeni a tójšto wěcneje škody je wuslědk wobchadneho njezboža, kotrez sta so sobotu popołdnju mjez Smjerdźacej a Łazkom. Tam zajědźe 41lětny ze swojim VWjom w lěwej křiwicy na napřećiwnu jězdnju a zrazy do napřećo přijěduceho Daewoowa. Tón so na to zwróći a wosta na třěše ležo. Mjeztym zo so wodźer VWja njezrani, dyrbjachu 75lětneho wodźerja Daewoowa kaž tež jeho sobujěducej w starobje 73 a 39 lět ambulantnje zastarać. Wobě wosobowej awće so dospołnje skóncowaštej. Kaž Zhorjelska policajska direkcija zdźěli, trochuja wěcnu škodu na wjacore dźesaćtysacy eurow. Policija pad nětko přepytuje.
Policija (02.09.16)
Mortwu namakali
Wojerecy. 25lětnu wobydlerku Wojerowskeho domu za požadarjow azyla su zawčerawšim mortwu w jeje stwě namakali. Dokelž njeje přičina jeje smjerće znata, su ćěło obdukowali. Pokiwy na złóstnistwo policija tuchwilu nima. Hdźe su mandźelski zemrěteje a jeje štyri dźěći, njeje znate. Kaž policija zdźěli, pak njeje 32lětny mandźelski podhladny. Tukanja, zo je něchtó žonu morił, su po dotalnych dopóznaćach wopačne. Kriminalna policija pad přepytuje.
Policija (01.09.16)
Nic njeboz, ale granata
Šunow. Spodźiwny metalowy nastroj su mějićeljo ležownosće zawčerawšim wječor w Šunowje při dźěle w zahrodce namakali. Spočatnje mějachu woni namakanku hišće za prědni dźěl stareje njebozoweje mašiny. Při blišim wobhladanju pak so wukopa, zo jedna so wo tankowu granatu. Powostanku z časa Druheje swětoweje wójny su sobudźěłaćerjo rozbuchlinu wotstronjowaceje słužby hišće samsny wječor wotwjezli a fachowje znješkódnili.
Policija (30.08.16)
Do jastwa dyrbjał
Bělšecy. Wobsadka ciwilneho policajskeho jězdźidła je zawčerawšim w Bělšecach wosobowe awto kontrolowała. Při tym so wukopa, zo přećiwo 44lětnemu sobujěducemu dwaj přikazaj zajeća předležitej. Dokelž bě wón wospjet drogowych deliktow dla napadnył, bu k wjacorym měsacam jastwa zasudźeny. Nastupił pak swoje chłostanje dotal njeje. Jako policisća jeho drastu a nachribjetnik kontrolowachu, namakachu wšelake nastroje za konsum drogow a snadne mnóstwo crystala. 44lětneho dowjezechu hnydom do jastwa.
Pony w měsće po puću
Kamjenc. Na Kamjenskej Pastwinej horje ćeknjeny pony je wčera rano na tamnišej Wuchodnej hasy po puću był. Hakle na Njeswačanskej dróze so poradźi štyrinohača popadnyć.
Policija (29.08.16)
W skale so zatepił
Häslich. 64lětny muž je so sobotu popołdnju w skale pola Häslicha w gmejnje Haselbachtal zatepił. Ze swojim dźesaćlětnym wnučkom so tam muž kupaše, nadobo pak so hižo na powjerch wody njewróći. Wnučk a dalši kupacy za podnurjenym pytachu, bohužel bjez wuspěcha. Mjeztym alarmowachu wohnjowych wobornikow, kotřiž sobu pytachu. Hakle hobbyjowaj nurjakaj, kotrajž běštaj připadnje na městnje, muža z něhdźe jědnaće metrow hłubokosće wućahnyštaj. Jeho reaniměrować so njeporadźi, tak zo móžeše přiwołany nuzowy lěkar jenož hišće smjerć 64lětneho zwěsćić. Dokładne přičiny njezboža policija nětko přepytuje.
