Policija (13.09.18)

štwórtk, 13. septembera 2018 spisane wot:

Do latarnje a do murje zjěł

Radwor. Chětro natutkany bě wodźer transportera, kiž je zawčerawšim popołdnju w Radworju do latarnje a na to do murje zrazył. Při wobdźěłanju njezboža napadny policistam jeho chorhojčka. Pola 31lětneho zwěsćichu 2,14 promilow alkohola w kreji.

Policija (12.09.18)

srjeda, 12. septembera 2018 spisane wot:

Z 222 km/h po awtodróze smalił

Budyšin. Při kontroli na awtodróze A 4 pola Budyšina lepichu zawčerawšim w běhu třoch hodźin 90 přespěšnych šoferow. Najnuznišo měješe wodźer awta, kiž je při dowolenych 120 kilometrow na hodźinu z 222 km/h nimo błyskača smalił. Wón ma nětko 600 eurow pokuty płaćić, dóstanje dwaj dypkaj w Flensburgu a njesmě štwórć lěta žane awto wodźić.

Policija (11.09.18)

wutora, 11. septembera 2018 spisane wot:

Grat z awtow kradnyli

Malećicy. Na awtach twarskich firmow składowany grat bě minjeny kónc tydźenja cil paduchow w Malećicach (Maltitz) pola Wósporka. Gratowe kašćiki skućićeljo namócnje wočinichu a pokradnychu z nich wšelake elektriske mašiny w cyłkownej hódnoće něhdźe 5 000 eurow. Nastatu wěcnu škodu na awtach trochuja na něhdźe 300 eurow, kaž Zhorjelska policajska direkcija zdźěli.

Policija (10.09.18)

póndźela, 10. septembera 2018 spisane wot:

Padušnu cwólbu zajeli

Nadźanecy. Štyri wosoby wopřijacu padušnu cwólbu je policija minjeny pjatk w Nadźanecach (Nadelwitz) pola Budyšina zajała. Swědcy běchu do toho podhladne awto na parkowanišću kupnicy wobkedźbowali. Jako tam zastojnicy přijědźechu, zwěsćichu woni štyri wosoby, kotrež pod swojej drastu a w tobołach rubiznu z wokolnych wobchodow k awtu njesechu. Při tym jednaše so wo elektroniku a kosmetiku w hódnoće něhdźe 600 eurow. Někajku kupnu kwitowanku za to třo mužojo w starobje 31, 42 a 45 lět kaž tež 21lětna žona předpołožić njemóžachu. We wokolnych wobchodach so nimo toho podhlad wobkrući, zo tam pokradnjene wěcy pobrachowachu. Wšěch štyrjoch na to zajachu a awto za dalše přepytowanja sćazachu.

Policija (07.09.18)

pjatk, 07. septembera 2018 spisane wot:

Pisany kwěćel deliktow

Budyšin. Zawčerawšim wječor je policija na Budyskej Stieberowej wosobowe awto typa Seat Ibiza kontrolowała a hnydom wjacore delikty zwěsćiła. Přičinjene čisło scyła k awtu njesłušeše. Nimo toho namakachu w jězdźidle dalše, zwjetša njepłaćiwe čisła, mjez druhim jedne pokradnjene. Kaž so dale wukopa, 28lětny šofer scyła žanu jězbnu dowolnosć njewob­sedźeše a jeho awto ani přizjewjene ani zawěsćene njebě.

Policija (06.09.18)

štwórtk, 06. septembera 2018 spisane wot:

Dyrbitaj pokutu płaćić

Horni Wujězd. W padźe zatykaneje awtodróhi njesměš prosće nabóčne pasmo wužiwać, zo by spěšnišo doprědka přišoł. Tole wěstaj nětko šoferaj, kotrejuž je policija zawčerawšim pola Hornjeho Wujězda na A 4 při tym lepiła. Wonaj dyrbitaj nětko wobaj pokutu 90 eurow płaćić a dóstanjetaj dypk w Flensburgu.

Policija (05.09.18)

srjeda, 05. septembera 2018 spisane wot:

Čołmik zaso namakali

Hamor. Hižo spočatk julija bě so při Hamorskim towarstwowym domje pa­dlowanski čołmik zhubił. Tón wuhlada policajski zastojnik zawčerawšim w swojim wólnym času w zahrodce na Diesterwegowej w Hamoru poł zakryty pod planu. Hromadźe z wobsedźerjom sej po­licisća tam dojědźechu a zwěsćichu, zo jedna so wo pokradnjeny čołmik. Štó bě jón wotwjezł dyrbja nětko wuslědźić.

Policija (04.09.18)

wutora, 04. septembera 2018 spisane wot:

Předjězbu njewobkedźbował

Wojerecy. Wjace hač 60 000 eurow škody nasta při wobchadnym njezbožu zawčerawšim dopołdnja we Wojerecach. 60lětny šofer Mercedesa njewobkedźbowaše na křižowanišću předjězbu 32lětneho wodźerja VWja a zrazy do jeho jězdźidła. 32lětny so snadnje zrani. Policija pozdźišo zwěsći, zo měješe wodźer Mercedesa 0,38 promilow alkohola w kreji.

Policija (03.09.18)

póndźela, 03. septembera 2018 spisane wot:

Awtomat rozbuchnyli

Wojerecy. Dokelž słyšeše wobydler na Wojerowskej Bebelowej sobotu wječor krótko do 22.30 wulki wrjeskot, zawoła wón policiju. Zastojnicy wuhladachu na městnje rozbuchnjeny cigaretowy awtomat a třoch podhladnych w starobje 16, 18 a 19 lět. Młodostni, kotrychž policija hižo derje znaje, hnydom přiznachu, zo běchu awtomat rozbuchnyli. Nimo toho mějachu w swojich nachribjetnikach wjetše mnóstwo cigaretow.

Policija (31.08.18)

pjatk, 31. awgusta 2018 spisane wot:

Starušku při pohrjebnišću wurubił

Běła Woda. Při pohrjebnišću na Běło­wodźanskej Georga Beckowej bu za­wčera­wšim 87lětna žona nadpadnjena a wurubjena. Skućićel čakaše na nju při pó­dlan­skim zachodźe na pohrjebnišćo, pryskaše jej njeznatu maćiznu mjezwoči a wutorhny starušce tobołku. W njej běchu móšeń z něšto pjenjezami, wupokaz a kluče. Dalša žona na pohrjebnišću chwataše jej na pomoc. Přiwołana poli­cija w bliskosći za rubježnikom pytaše, ale jeho tež z pomocu psa njenamaka. Kriminalisća pad dale přepytuja.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND