Policija (13.03.17)

póndźela, 13. měrca 2017 spisane wot:

Hač chcedźa rjedźić?

Wojerecy. Swojoraznu a skerje njezwučenu rubiznu wupytachu sej paduši, kotřiž běchu so w času wot pjatka popołdnja hač do soboty ranja do wjaceswójbneho domu we Wojerecach zadobyli. Z jedneje z pincow pokradnychu tři bleše płokanskeho srědka kaž tež blešu rjedźenskeho srědka za nuzniki w cyłkownej hódnoće 15 eurow. Hač trjebaja je za nalětnje rjedźenje, bohužel znate njeje.

Policija (10.03.17)

pjatk, 10. měrca 2017 spisane wot:

Hólčkej žiwjenje wuchowali

Brětnja/Michałki. Dźakowano swojemu angažowanemu a wobhladniwemu jednanju su zawčerawšim wjacore žony při jězoru w Brětni/Michałkach blisko Wojerec třilětneho hólca před smjerću wuchowali. Tón bě něhdźe w 15.30 hodź. na bliskim hrajkanišću dohladej swojeje maćerje twochnył. Mać hnydom za nim pytaše a wuhlada jeho, kak bjez pohiba na wodźe jězora płuwa. Jeje wołanje je wjacore žony w bliskosći na njezbožo skedźbniło. Wone skočichu do wody, wućahnychu dźěćo z wody a započachu je reaniměrować, doniž přiwołany nuzowy lěkar njepřijědźe. Wuchowanski heli­kopter dowjeze třilětneho do specialneje kliniki. Po informacijach policije hólčk hižo w žiwjenskim straše njeje. Policija dźakuje so žonam za jich kuražowane jednanje, z kotrymž su dźěsću žiwjenje wuchowali.

Policija (09.03.17)

štwórtk, 09. měrca 2017 spisane wot:

Žonje žiwjenje wuchowali

Kamjenc. 31lětnej žonje w Kamjencu su policisća zawčerawšim po wšěm zdaću žiwjenje wuchowali. Wona bě hladarnju w měsće wopušćiła a bě w psychisce napjatym połoženju. Policisća za njej blisko dwórnišća pytachu a namakachu ju při zachodźe do tunla, hdźež steješe na kolijach a čakaše na bližacy so ćah. Zastoj­nicy lokomotiwnika warnowachu a sća­hnychu žonu z kolijow. Bjez tajkeho wobhladniweho­ jednanja by najskerje k tragiskemu njezbožu dóšło, kaž w policajskej rozprawje rěka.

Policija (08.03.17)

srjeda, 08. měrca 2017 spisane wot:

Wolij woheń zamiškrił

Pomorcy. Wohnjowych wobornikow, wuchowansku słužbu a policiju su za­wčerawšim wječor do Pomorc wołali. W kuchni 77lětneje žony paleše so hornc z horcym wolijom. Jako rentnarka wobradu wuhlada, wupřestrěwachu so płomjenja hižo na kuchinske kamory. Dobrowólne wohnjowe wobory z Pomorc, Bukec, Kubšic a Błócan přijědźechu z dźesać jězdźidłami a wjace hač 60 wobornikami, kotřiž móžachu hóršemu zadźěwać. Žonu a jeje dwě lěće staršeho mandźelskeho dowjezechu do chorownje. Wěcna škoda w potrjechenym bydlenju a w tym poschod niže wučinja dohromady 25 000 eurow.

Diesel kradnyli

Kamjenc. We wulkim stilu su njeznaći minjeny kónc tydźenja w Kamjencu diesel kradnyli. Na twarnišću na Sewjernej hasy wotklumpachu z třoch twarskich mašinow wjace hač tysac litrow ćěriwa a načinichu tak 1 200 eurow škody. Kaž policija zdźěli, su twarscy dźěłaćerjo paducham njeskutk chětro wolóžili. Wěka tankow twarskich mašinow drje běchu začinjene, nic pak zamknjene.

Policija (07.03.17)

wutora, 07. měrca 2017 spisane wot:

Tójšto cigaretow namakali

Horni Wujězd. 400 pakćikow cigaretow su policisća wčera rano we wosobowym awće na awtodróze A 4 namakali. W Litawskej přizjewjeny Peugeot, kotryž bě do­ směra na Drježdźany po puću, kontro­lowachu zastojnicy na parkowanišću w Hornim Wujězdźe. Podhladneju w starobje 33 a 36 lět zajachu. Dawkowa škoda wučinja něhdźe 15 000 eurow.

Policija (06.03.17)

póndźela, 06. měrca 2017 spisane wot:

Kolesowar padnył a zemrěł

Roholń. Tragiski wukónc měješe kolesowanska jězba 75lětneho muža sobotu popołdnju blisko Wojerec. Wón bě ně­hdźe w 16.30 hodź. na kolesowanskim puću podłu statneje dróhi S 108 z Wojerec do směra na Roholń we Łazowskej gmejnje po puću. Hišće do wsy wón z dotal njeznateje přičiny a po wšěm zdaću bjez wobdźělenja dalšich wosobow ze swojim trekingowym kolesom padny a so na hłowje ćežko zrani. Byrnjež ludźo zastali a trěbne prěnje pomocne na­prawy zawjedli, muž hišće na městnje njezboža zemrě. Wobchadna njezbožowa słužba policije pad přepytuje.

Policija (03.03.17)

pjatk, 03. měrca 2017 spisane wot:

15 000 eurow škody

Porchow. Na A 4 mjez Ohornom a Porchowom dyrbješe wčera wječor 41lětny wodźer Opela haćenja wobchada dla borzdźić. Za nim jěducy 42lětny šofer Škodowki tole přepozdźe spózna a zrazy do Opela. Zranił so na zbožo nichtó njeje. Na woběmaj awtomaj pak nasta škoda něhdźe 15 000 eurow.

Policija (02.03.17)

štwórtk, 02. měrca 2017 spisane wot:

Techniski defekt woheń zawinił

Droby. Na arealu recyclingownje w Drobach je so wčera rano nastroj k rozkuskowanju smjećow palił. Kaž policija zdźěli, bě přičina wohenja techniski defekt. Wohnjowa wobora zamó płomjenja spěš­nje po­dusyć. Zranił so nichtó njeje.

Pytaja swědkow

Kamjenc. Njeznaći su wutoru w Kamjencu Mercedes wobškodźili a ćeknyli. Něchtó bě do zadnich duri zajěł. Škoda wučinja 2 000 eurow. Swědcy njezboža njech so pola policije přizjewja.

Policija (01.03.17)

srjeda, 01. měrca 2017 spisane wot:

Paduši, randalěrar a pjany na kolesu

Kulow. Hnydom wjacore njeskutki dyrbješe policija w Kulowje za čas póstnic registrować.­ Kaž dźensa zdźěla, běchu njeznaći w nocy na wčerawšu wutoru kasu z něhdźe 200 eurami a awtowe klučiki z imbisa na torhošću pokradnyli. Policija za skućićelemi slědźi.

Wčera su swědcy policiju na Kulowsku Haškowu wołali. Woni běchu wobkedźbowali, kak muž wonkowny špihel awta wotkopnje. Zastojnicy móžachu hišće na městnje 23lětneho skućićela přesłyšować. Čehodla je špihel wotkopnył, njeje wujasnjene, z padom so mjeztym statne rěčnistwo zaběra.

Pjany z kolesom po puću bě wčera 30lětny na Kulowskej Krabatowej. Test wunjese 1,82 promilow alkohola w kreji. Policija wza muža sobu k braću kreje.

Policija (28.02.17)

wutora, 28. februara 2017 spisane wot:

Garaža so wotpaliła

Porchow. Z njeznatych přičin je so wčera w Porchowje garaža wotpaliła, tež w njej wotstajeny VW-transporter. 28 wobor­nikow z Porchowa, Hornjeho Wujězda a Panec móžeše rozpřestrěću płomjenjow na bydlenski dom zadźěwać. 42­lětna wobydlerka poćerpje šok, a dyrbjachu ju ambulantnje zastarać. Kriminalna słužba pad přepytuje.

Wopity randalěrował

Dźěžnikecy. Zwady dla běchu swědcy policiju njedźelu do Dźěžnikec na pomoc wołali. Zastojnicy spytachu wopiteho 32lětneho změrować, tón pak jich nastajnosći křiwdźeše. Test wunjese 2,42 promilow alkohola w kreji, na čož jeho policija do fachoweje kliniki dowjeze.

nawěšk

nowostki LND