Pančicy-Kukow. K wobchadnemu nje­zbožu, na kotrymž běštej dwě jězdźidle wobdźělenej, dóńdźe zawčerawšim na statnej dróze S 100. Wodźer Daimlera-Benz bě z Pančic-Kukowa do směra na Kamjenc po puću. Blisko Hlinowca skoči jemu naraz sorna do awta a zleća hišće do napřećo jěduceho Passata. Tež jeho wodźer njemóžeše so zražce ze zwěrjećom wuwinyć. Wěcna škoda na awtomaj wučinja ně­hdźe 1 200 eurow. Sorna bě nablaku mortwa.

Budyšin. Po wobšěrnych přepytowanjach je kriminalna policija štyri wobšudnistwa z pokradnjenymi EC-kartkami wujasniła. K njeskutkam dóšło bě loni w decembru kaž tež lětsa w januaru a měrcu w Budyšinje. Policija je w medijach z pasowymi wobrazami skućićelow zjawnje za njeznatymi slědźiła. Tež w telewizijnym wusyłanju MDR „Kripo Live“ w lěću wo tym rozprawjachu. Swědcy njeskutka podhladnych spóznachu. Na zakładźe pokiwa swědka z Drježdźan wuslědźichu kriminalisća 41lětneho čěskeho staćana a 14lětnu sobuskućićelku. Tež Budyšanaj w starobje 13 a 17 lět stejitaj w fokusu přepytowanjow. Njeskutka podhladnym wumjetuja, zo su z pokradnjenymi pjenježnymi kartkami w bliskich awtomatach něhdźe 3 800 eurow wot­zběhnyli. Za njeskutka podhladnymaj z Čěskeje kriminalna policija dale pyta.

Kamjenc. W nocy na njedźelu je so na Kamjenskej­ Johannesa Frankowej hasy­ awto paliło. Wohnjowa wobora měješe woheń spěšnje pod kontrolu. Krótko po tym lepichu policisća tež 25lětneho podhladneho zapalerja.

Rodecy. Jako je sej najwjetši dźěl ludźi druhi dźeń hód popołdnju kofej a wosušk słodźeć dało, wołachu wohnjowych wobornikow do lěska mjez Rodecami w Bukečanskej gmejnje a Łuskom, přisłušacym Wósporkej, k hašenju. Tam paleše­ so štom, kiž bě chětro dudławy. Za 15 kameradow třoch wohnjowych woborow pak njebě problem, płomjenja spěšnje podusyć. Štom na to podrězachu, tak zo z njeho hižo žadyn dalši strach njewuchadźeše. Nětko policija pruwuje, hač drje běchu jón worakawcy zapalili, přetož při nimale nalětnim wjedrje sobotu wuchodnje Budyšina žane njewjedra z błyskami registrowali njejsu.

Biskopicy. Tak mjenowany Móst lěsneje myški (Haselmausbrücke) nad zwjazkowej dróhu B 98 w Biskopicach je so dźensa w nocy palił. Krótko po połnocy třo mužojo, kotřiž běchu na dompuću z adwentnički, woheń wuhladachu a wohnjowu woboru alarmowachu. Jako dobrowólni wobornicy z Biskopic a Geißmannsdorfa z dohromady 24 kameradami přijědźechu, běchu so płomjenja hižo na dźěl mosta rozpřestrěli. Na zbožo móžachu je wobornicy spěšnje zhašeć. Kaž so pozdźišo wukopa, bě něchtó móst na dwěmaj městnomaj ze starymi no­winami zapalił. Dźěl z nich wobornicy zawěsćichu. Snano móža wone pokiw na móžneho skućićela być. Na jednym mě- stnje ma špundowanje mosta nětko dźěru. Jeno dźakowano spěšnemu alarmowanju móžachu wjetšej škodźe zadźěwać. W Biskopicach pak so nětko prašeja, hač drje je tuchwilu zaso njeznaty zapaler w měsće po puću.