Hosćo su stajnje rady witani

póndźela, 06. awgusta 2018
artikl hódnoćić
(0 )

Na lětuši kurs čěšćiny w Chrósćicach su so wjacori wobdźělnicy přizjewili. Milenka Rječcyna je so z nawodu kursa a wučerjom čěšćiny w Serbach Janom Breindlom rozmołwjała.

Kelko zajimcow je so na kurs přizjewiło?

J. Breindl. Tuchwilu su to dźewjećo, kotřiž chcedźa so na kursu na Chróšćanskej farje wobdźělić. Woni pochadźeja wosebje z Chrósćic a wokolnych wsow. Mjez nimi pak je tež zajimc z Budyšina.

Sće składnosć měł, wobdźělnikow hižo do kursa zeznać?

J. Breindl: Haj, z někotrymi sym wo­sobinsce, z dalšimi telefonisce rěčał. Mějach­ pak zaćišć, zo tež jich hižo znaju. Přiwšěm njedóstach mjena a mjezwoča hišće hromadu. Dźensa popołdnju při zahajenju je so nětko wšitko wujasniło.

Kajki rěčny staw na polu čěšćiny wob­dźělnicy kursa maja?

J. Breindl: Prajili mi su, zo dotal čěsce njerěča. Z nazhonjenja pak wěm, zo je Serbam poměrnje lochko moju maćeršćinu nałožować. Tuž ma tón abo tamny hižo zakładne znajomosće. Mój zaměr je, jim dać pokiwy, što serbšćinu a čěšćinu rozeznawa. Tak zmylki njeworaja.

Njejsće prěni, kiž tajki kurs přewjeduje, je pak­ to Waš prěni kurs. Złožujeće so na nazhonjenja swojich předchadnikow?

J. Breindl: Wěm, što su woni wšitko čini­li. To pak zwjetša nałožować njemóžu. Wšako su do toho přez cyły dźeń z wobdźělnikami rěč wuknyli. Tež tónkróć mějachmy wšědnje pjeć hodźin wučby zaplanowanych. Mój kurs pak wotměwa so hač do pjatka wšědnje wot 14 do 18.30 hodź. Wjetšina wobdźělnikow njemóžeše kurs dopołdnja wopytać. Tak smy tule wariantu wolili. Po wšědnej wučbje budźe přestawka a potom slěduje wječorny poskitk.

Su do tychle přidatnych poskitkow jenož wobdźělnicy kursa zapřijeći?

J. Breindl: Ně, na nje móža wšitcy zajimo­wani wšědnje w 19 hodź. přińć. Jenič­ce štwórtk započnjemy hižo hodźinu prjedy. To chcemy z Davidom Hamrom bjesadować na temu „Što Češa wo swojich susodach (nje)wědźa“. Hamr skutkuje w regionalnym studiju Čěskeho rozhłosa w Liberecu. Jutře chcemy zhromadnje spěwać, srjedu budźe přednošk Jitki Polívkoveje na temu „Bibliske a druhe rěčne wobroty w čěšćinje“. Pjatk zaběra­my so z čěskim filmom. Chcemy zhromadnje rozsudźić, kotry film sej wobhladamy. Wšitke poskitki budu w čěskej rěči, po potrjebje pak do serbšćiny přełožujemy.

Planujeće tohorunja wulět do Čěskeje?

J. Breindl: Wjeršk kursa budźe sobotu wuprawa do Libereca. Program chcemy sej wotpowědnje wjedru zarjadować. Jasne je, zo změjemy měšćansku ralley. Chcu pak sej w běhu kursa z wobdźěl­nikami dorěčeć, što hižo znaja resp. što by jich na ekskursiji zajimowało. A to chcemy potom tež činić.

W kotrej měrje podpěruje Was Rěčny centrum­ WITAJ, kiž je nošer Wašeho skutkowanja w nadawku čěskeho ministerstwa za kubłanje we Łužicy?

J. Breindl: Wottam dóstawam pře­dewšěm administratiwnu pomoc, štož kurs nastupa. To rěka, zo přewostaja mi RCW trěbnu techniku, kaž beamer abo taflu. Wobsahowe dźěło pak sam zamołwjam.  Wutrobny dźak!

wozjewjene w: Rozmołwa
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND