We wsy blisko Drjowka na kromje wuhloweje jamy měrja so na bliskowočerstwjenje
Něhdźe 130 wsow, wjetšich a mjeńšich – zwjetša serbskich a dwurěčnych sydlišćow – je brunica w Delnjej a Hornjej Łužicy dotal „póžrěła“. Něhdźe 25 000 ludźi dyrbješe swój dom, swój statok, swoju domiznu wopušćić. Miłoraz w Slepjanskej wosadźe budźe w tym rjedźe poslednje wotbagrowane sydlišćo. W Prožymju (Proschim), němsko-serbskej wsy mjez Złym Komorowom a Grodkom, pak móža so wjeselić. Kaž z koncerna Łužiska energija a milinarnje (LEAG) njedawno rěkaše, nochce tón jamu Wjelcej-juh dale rozšěrić, a tak móže Prožym stejo wostać.