Stać na sněhakach njeje jednora wěc, je pak za kóždeho hódne nawuknyć. Z tutej mysličku nastajichmy so jako rjadowni 8-1 a 8-2 Serbskeje wyšeje šule Ralbicy na sněhakowanske lěhwo do Altenberga.
Najebać stawkow železnicarjow wotjědźe naš ćah póndźelu, dnja 29. wulkeho róžka, dypkownje wot nastupišća z Kamjenca do směra na rudnohorinske sněhakowanišćo. Program zamołwitych wučerjow knjeza Rjedy, knjeza Wornarja, knjeza Zahrodnika a knjeza Wowčerja běše přihotowany a tak započinaše naš prěni dźeń hnydom ze zawjedźenjom do alpinskeho sněhakowanja. Po sćoplenju ze serbskim kołoteptanjom a zapokazanju k wobchadźenju ze sněhakowanskim wuhotowanjom, rozrjadowaštej so našej rjadowni najprjedy do započatkarskeje a pokročowaceje skupiny. Zymske wjeselo steješe wotnětka tři dny na planje.
