W Nowej Niwje byli

pjatk, 14. februara 2020 spisane wot:

Choćebuz. Moderator delnjoserbskeho telewizijneho magacina „Łužyca“ Christian Matthée wita přihladowarjow sćelaka RBB jutře, sobotu, 15. februara, w 13.40 hodź. z błótowskeje Noweje Niwy, z tamnišeho hosćenca „K hornim Błótam“. Hižo 122 lět korčma wobsteji a tež wjele serbskeho bě so w njej wotměwało. Hižo lěta su wosebje ptačokwasne programy SLA jara woblubowane a derje wopytane. Wo lětušim spektaklu powěda režiser Marian Bulank.

W dalšich přinoškach „Łužycy“ předstaja noweho krajneho zamołwiteho za serbske naležnosće, pohladaja do zarjada za serbske wuwiwanje w Choćebuzu, rozprawjeja wo Choćebuskim komponisće a jeho lubosći k serbskej hudźbje, předstaja młodu žonu ze serbskimi korjenjemi a sposrědkuja kulturne pokiwy.

Wo starosćach burow

pjatk, 31. januara 2020 spisane wot:
Budyšin. Prašenja a wobmyslenja serbskich ratarskich zawodow budu jedna z temow přichodneho hornjoserbskeho telewizijneho magacina Wuhladko jutře, sobotu, w 11.45 hodź. na sćelaku MDR. Srjedź januara přewodźachu telewiznicy ratarjow, kotřiž su z traktorami w Drježdźanach přećiwo planowanemu agrar­nemu paketej demonstrowali. Dale wopytachu w rudnohórskim Schneebergu třoch młodych Serbow, kotřiž wu­knu tam na fachowej policajskej šuli. Jich so mjez druhim prašachu, hač chcedźa so po wukubłanju do Łužicy wróćić. W dalšim přinošku dopominaja na Jurja Grósa, kiž je 28. decembra zemrěł. Hač do měrliweje rewolucije bě wón žiwjenje w dwurěčnej Łužicy rozsudnje sobu wobwli­­wował a steješe při tym stajnje mjez politi­ku SED, cyrkwjemi a narodnym wědomjom swojich serbskich krajanow. A skónčnje rozprawjeja w jutřišim wusyłanju wo nowych Slepjanskich spěwarskich kaž tež wo morawsko-serbskim wječoru minjenu sobotu w Hórkach. Wu­hladko wospjetuja póndźelu, 3. februara, w 6.10 hodź. na MDR a sobotu, 8. februara, w 13.35 hodź. na RBB.

Wo serbskej opoziciji

pjatk, 10. januara 2020 spisane wot:
Budyšin (SN). Před dokładnje 30 lětami, w januarje 1990 bě wona na wjeršku dźěła­ – Narodna zhromadźizna, jenička serbska opoziciska skupina we Łužicy. Wosebje za kulojtym blidom je tale iniciatiwa politiski přewrót w Serbach zasadnje wobwliwowała. Přewrótej kaž tež koncertej w Chróšćanskej „Jednoće“, Hórnikowemu domej a dalšim temam wěnuje so jutře, 11. januara, w 11.45 hodź. Wuhladko, telewizijny magacin MDR.

Europeada a kapałnicy

pjatk, 06. decembera 2019 spisane wot:

Drježdźany. 4. europeada so bliži. Klětu wot 20. do 28. junija wotměje so wona w Korutanskej. Napjatosć tuž přiběra, a mjeztym je tež jasne, přećiwo kotrym mustwam matej serbskej wubrance muži a žonow w předkole nastupić. Serbski telewizijny magacin Wuhladko bě na wulosowanju w Awstriskej pódla a je tež hižo kwartěr serbskich koparjow kaž tohorunja tamniše hrajnišća wopytał.

Rozprawjeć budźe telewizijny magacin w našej maćeršćinje sobotu, 7. decembra, w 11.45 hodź. tež wo předstajenju „Serbskeho rekwiema“ w Ketličanskej cyrkwi. Tajki hudźbny kruch nazwučować a jón z přewažnje němskorěčnymi chórowymi spěwarkami a spěwarjemi w originalnej rěči zanjesć – za to dyrbiš zmužity być.

Dale wěnuja so nowej praksy babow w Swinjarni, stawiznam Drježdźanskich kapałnikow a što maja Serbja z nimi činić, kaž tež lětušej schadźowance. Wuhladko wospjetuja póndźelu, 9. decembra, w 6.10 hodź. na MDR a sobotu, 14. decembra, w 14.10 hodź. na sćelaku RBB.

Wo dźěćacej wsy

pjatk, 29. nowembera 2019 spisane wot:

Aktiwity za zbrašene dźěći w Běłoruskej, kotrež nawjeduje Serb Pawoł Hrjehor w Bramborje, steja w srjedźišću krótkofilma telewizijneho sćelaka RBB. Pask wo dźěćacej wsy Gomel, něhdźe 50 kilometrow wot Černobyla zdalenej, před­staja we wobłuku wusyłanja „Hwězdne hodźiny – adwentna protyčka“. Njedźelu, 1. decembra, wotewru prěnje woknješko kalendra, kotrež je nastawacej dźěćacej wsy za zbrašene syroty wěnowane.

Wjes twarja jeničce z darjenych pjenjez­. Předewšěm pochadźeja wone z Němskeje, Awstriskeje, Italskeje a Pólskeje. Tež we Łužicy ludźo projekt pod­pěruja. „Jim a dalšim zajimcam budźe zajima­we, što smy z darjenych pjenjezy mjeztym natwarili“, rjekny Hrjehor SN.

Krótkofilm wusyłaja njedźelu, 1. decembra we 8.25 hodź. na sćelaku RBB. Za 15.58 hodź., 18.28 hodź. a 19.58 hodź. su dalše rozprawy planowane. Tež internetnje pod www.sternstunden.de móža sej zajimcy rozprawu wobhladać.

Što serbskosć wučinja?

pjatk, 15. nowembera 2019 spisane wot:

Choćebuz. Mnozy w Delnjej Łužicy maja serbskosć za zhubjenu. Su pak tež ludźo, kotřiž namakaja w njej zwiski k swójskim stawiznam, k swójbje, po­wołanju abo cyle jednorje k domiznje. Samo, hdyž to jich bjezposrědnja do­mizna njeje­. Wobkedźbowanja wšědneho dnja, prašenje, što serbskosć wučinja a je bjez našeje rěče serbska identita móžna? Wo to­ dźe w filmje „Verlieren und Finden – Pušćiś a pśimjeś“ Romana Pernaka, kotryž­ pokazaja jutře, sobotu, w 13 hodź. w delnjoserbskim magacinje Łužyca te­lewizije RBB.

Wusyłanje wospjetuje sćelak MDR 23. nowembra w 11.45 hodź.

Serbske lěto w Čěskej

pjatk, 01. nowembera 2019 spisane wot:

Budyšin (SN). Hač do kónca lěta 2020 wobswětla towarstwo Societas Amicuum Liberec z wjacorymi partnerami, kaž z Towarstwom přećelow Serbow a Do­mo­winu, serbske stawizny a kulturu w Čěskej. Wuchadźišćo akcije je 70. róčnica zało­ženja Liberecskeje wotnožki Serb­ske­ho gymnazija. Wo tym rozprawjeja jutře, 2. nowembra, we Wuhladku, kotrež wusyła telewizija MDR w 11.45 hodź.

Dalša tema nowemberskeho magacina rěka: „Štó pojědźe na europeadu?“ Pod hesłom „Murja před 30 lětami pad­ny­ła“ praša so Wuhladko Serbow, kak su woni historiski dźeń 9. nowembra před třiceći lětami we Łužicy abo samo w Berlinje dožiwili.

Změna generacijow?

pjatk, 04. oktobera 2019 spisane wot:
Budyšin. Swobodne dźěłowe městna w serbskich institucijach budu jedna tema přichodneho hornjoserbskeho telewizijneho magacina Wuhladko jutře, sobotu, w 11.45 hodź. na sćelaku MDR. Přichodne měsacy ma so tójšto dźěłowych městnow w serbskich institucijach znowa wobsadźić. Za někotre kaž za jednaćelstwo Ludoweho nakładnistwa Domowina maja požadarjow. Za druhe městna pak hižo dlěje podarmo zajimcow pytaja. Přińdźe přichodna změna generacijow w serbskich běrowach – abo wostanu někotre stólcy tola prózdne? Dale rozprawjeja wo nowym oratoriju „Hrodźišćo“ z pjera Měrćina Weclicha a Madleny Nasticcyneje a kak su so akterojo na njón přihotowali. Nimo toho póńdźe wo nowu wustajeńcu w Budyskim Serbskim muzeju „Sorbian Street Style“ a wo Křesćana Zahrodnika, kiž je nowy němski mišter w mnohostronskim jěchanju amaterow. 30lětny Chróšćan je w Hannoverje-Langenhagenje titul dobył.

Wo Juraju Kubańku

pjatk, 20. septembera 2019 spisane wot:

Choćebuz (SN). W septemberskim delnjoserbskim telewizijnym magacinje Łužyca­ – jutře, 21. septembra, w 13.30 hodź., w telewizijnym sćelaku RBB – wěnuja so we wobłuku monotematiskeho wusyłanja žiwjenju a skutkowanju Juraja Kubańki. K tomu pokazaja film Hellmutha Henneberga a Reinera Nagela „Juraj­ Kubańka – Miłosć kamjenja“ (choreo­grafija žiwjenja).

Loni 31. oktobra woswjeći w Bratislavje bydlacy choreograf swoje 90. narodniny. Kubańka je lětdźesatki za Serbski ludowy ansambl choreografije stworił, kotrež njejsu hač do dźensnišeho na swojim błyšću zhubili. Eksemplarisce za njeho je twórba „Skałarska balada“.

Serbska rěčna šula

pjatk, 13. septembera 2019 spisane wot:
Budyšin (SN). Šule w dwurěčnej Hornjej Łužicy trjebaja nuznje serbskorěčnych wučerjow. Na uniwersitach wukubłany dorost dawno hižo njedosaha. Z njedawno wotewrjenej Serbskej rěčnej šulu w Budyšinje chcetej kultusowe ministerstwo a Sakski krajny zarjad za šulu a kubłanje pomhać problem rozrisać. Kaž wučerjam poski­ćeja tam tež rěčne kursy sobudźěłaćerjam zarjadow. Wo tym rozprawjeja jutře, 14. septembra, w 11.45 hodź. we Wuhladku. Wćipni być móža přihladowarjo sćelaka MDR tohorunja na přinošk wo musicalu Worklečanskeje šule „Quo vadis – dokal dźeš?“, kotryž je minjene dny w Chróšćanskej hali „Jednota“ wulki wuspěch žnjał.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND