Fantaziju dźěći a młodostnych budźić

wutora, 21. awgusta 2018
artikl hódnoćić
(0 )

W Budyskim Serbskim muzeju su wotnět­ka widźeć skulptury wuměłče Reginy Herrmann. Milenka Rječcyna je so­ ze zamołwitej za zjawnostne a medijo­pedagogiske dźěło muzeja Móni­ku Ošikowej rozmołwjała.

Wustajeńca „Dźěl wote mnje – Skulptury a klanki Reginy Herrmann“ traje njecyłej měsacaj. Je to dosć krótki čas. Změjeće přiwšěm program za dźěći a młodostnych?

M. Ošikowa: Haj, smy tajki přihoto­wali. Wuměłča zaběra so nimo zwo­braz­njenja žónskich bohowkow wosebje z łužiskimi mytiskimi postawami. Tež hdyž naši šulerjo praja, zo wšitke serbske bajko­we a bajowe postawy hižo znaja, móžu rjec, zo tomu zawěsće tak njeje. Runje postawy z Delnjeje a srjedźneje Łuži­cy njejsu pola nas jara znate. To skići składnosć, za čiłu a zdźěla nowu zaběru ze serbskimi bajkami a powěsćemi.

Kak sej to předstajiće?

M. Ošikowa: Chcemy fantaziju dźěći budźić. Najlěpše nazhonjenja mamy do­tal­ z tym, zo sej dźěći a młodostni powědki po swójskich idejach wumysla a je předstaja. Změju tež ručnu klanku, z kotrejež pomocu chcu wosebje mjeńšim dźěćom powědać, na přikład wo lutkach. Wjackróć změja wone zaso składnosć, paslić a molować a wězo sej dosć chwile brać za wobhladanje wustajeńcy.

Změje Regina Herrmann swójske zarjadowanja?

M. Ošikowa: Wona je pola nas lětsa hižo­ dwě dźěłarničce za twar klankow přewjedła. Tež w běhu wustajeńcy změ­jemy jedne zarjadowanje z njej. Budźe to wor­kshop za młodostnych wot 14 lět a dorosćenych. Tam chce wona ze zajimcami bohowku za kapsu šić. Za to trěbna je wušiknosć z jehłu. Tohodla je dźěłarnička myslena za staršich zajimcow.

Kak zdobywaće nošerjow dźěćacych dnjowych přebywanišćow a šulow, zo bychu ze swojimi chowancami do muzeja přišli?

M. Ošikowa: Mam wobstajny zwisk ke kubłanišćam. Rozšěrjam z mejlku naš aktualny flajer wo wustajeńcach w Serbskim muzeju. Telefonuju tež do pěstowarnjow a šulow, kotrež so pola nas same na zarjadowanje přizjewjeja.

wozjewjene w: Rozmołwa
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND