Jeno dźesaćo Serbow znali

wutora, 03. decembera 2019
artikl hódnoćić
(0 )

Towarstwo Škit Budyšin je na lětušej schadźowance za „1. serbsko-němske adwentne spěwanje na Wjacławskich wikach“ wabiło. Bosćan Nawka je so z Florianom Brězanom wo pozadkach akcije rozmołwjał.

Knježe Brězano, što je waše towarstwo pohnuło tajke spěwanje na dohodownych wikach wuhotować?

F. Brězan: Na lětušej Romantice smy so wopytowarjow prašeli, što jich z Budyšinom zwjazuje. Wuslědk bě wostrózbjacy: Žonop a wěže drje su často naspomnili, ale jeničce dźesaćo z cyłkownje sto naprašowanych mjenowachu Serbow. A wjetšina tychle dźesać procentow běchu turisća! To je nam pokazało, zo je serbstwo w měsće přemało prezentne. Po intensiwnej internej diskusiji, kak móhli na tym něšto změnić, smy so rozsudźili, serbsko-němske adwentne spěwanje jako jednu naprawu namjetować.

Kak je město na namjet reagowało?

F. Brězan: Za Wjacławske wiki zamołwity kulturny běrow Budyšina bě hnydom jara zajimowany. We wěcywustojnym zhromadnym dźěle z Andreasom Hennigom smy so na termin dojednali. Přichodnu njedźelu, 8. hodownika, chcemy w 16 hodź. na Hłownym torhošću zhromadnje spěwać. Přeprošamy wšěch, so wobdźělić – Serbow, Němcow a wšitkich dalšich zajimcow.

Kajke maće wočakowanja na akciju?

F. Brězan: Nadźijamy so, zo so znajmjeńša połsta Serbow na spěwanju wobdźěli. Nad dwójce telko ludźimi bychmy so wězo hišće bóle wjeselili. Snano móža zajimcy ze wsow lětuši wopyt Wjacławskich wikow z akciju zwjazać. Wažne nam je zjawnosći nazornje wuwědomić, zo je sprjewine město Budyšin wo­prawdźe bikulturne a zo tu dwě rěči nałožujemy.

Maće wotpohlad, akciju klětu wospjetować, ju takrjec kruće do dohodowneho programa Budyšina zakótwić?

F. Brězan: Lětsa najprjedy raz pohladamy. Je-li wothłós dobry a wotpowěduje-li ličba wobdźělnikow někak našej předstawje: Čehodla nic? Přiwšěm dyrbimy dale za pućemi pytać, kak móžemy serbstwo wosebje zwonka institucionalizowaneho zjawneho žiwjenja w stolicy Serbow sylnišo wuzběhować. Wutrobny dźak!

wozjewjene w: Rozmołwa
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND