Postup kóždej generaciji

pjatk, 20. decembera 2019
artikl hódnoćić
(0 )
Cordula Ratajczakowa

Tuchwilu je mi ćežko sej doma po swjatoku z mandźelskim hromadźe powěsće wobhladać. Njeje ani jenički dźeń, zo so klimowa politika jako tema njejewi, a mam sej přednošk naposkać: Němska – přirunojo z USA a Chinu – jenož mało wuhlikoweho dioksida do atmosfery pušća. My njejsmy ći lózyscy, ale ći tamni. Njewobchowamy swětowu klimu, hdyž energijowu a awtowu industriju na – po zdaću! – nješkódne maćizny přestajimy, ale najwjetši dźěl swěta nic. Z dieselowym awtom jězdźić njeje scyła tak zlě, hladaš-li na jědojte wotpadki tež při produkciji baterijow atd. Slěduje přeco wótra diskusija wo prawych ličbach a faktach.

Wothladajo wot stroweje dialektiki w mandźelstwje so jako kulturna antropologowka prašam, hač jedna so při tajkej alergiskej reakciji mojeho muža wo charakteristisku do 1980tych lět rodźeneje generacije. Jeje typiske ćeže je 1958 rodźeny sociologa Harald Welzer mjez druhim w swojim wosobinskim „wuznaću awtoholikarja“ wopisował. Je pak tež dźesać poručenjow spisał, kak móžeš hnydom započeć swět wuchować. Změna zadźerženja njeje jenož we wulkim kaž w małym móžna, ale historisce hladane normalna. Ćežko jenož je sej hinašu hač swójsku generacisku normalitu předstajić. Bě-li za industrijne generacije kur wuhenja znamjo derjeměća, je to za „generaciju Grety“ znamjo katastrofy. Běchu-li so spočatk 20. lětstotka w Berlinje bojeli, zo so město w konjacych kutlach potepi, mamy nětko škódny njerjad awtow wotstronić. A rozrisanja za jewjace so problemy mjenujemy postup. Politika ma nadawk, ramik tworić, zo móhli tute rozrisanja wuwiwać. Dźensa rěka tónle ramik w Němskej klimowy paket a na europskej runinje „green deal“ – zaměr klimyneutralneho kontinenta hač do lěta 2050. Tele předewzaće je prezidentka komisije EU Ursula von der Leyen z wiziju přizemjenja na měsačku při­runowała. Přiwisnikam zapřisahanskich teorijow, kotřiž njewěrja, zo bě čłowjek scyła na měsačku, je tuž jasne, zo je „green deal“ bajka mócnarjow. Móžeš pak jón prosće postup pomjenować.

Štož mandźelsku dialektiku nastupa: Mój muž je ryzy ekologiski hodowny štomik z korjenjemi wobstarał, meter wysoki. Tón sym wotpokazała. Byrnjež to postup njebył, chcu normalny wulki měć.

wozjewjene w: Rozmyslowane
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND