Hotuja so na swětowu prapremjeru epizodoweho filma z Grodka

Grodk (SN/bn). Filmowy label Lusatia Film hotuje so na swětowu prapremjeru swojeje prěnjeje produkcije „Ein Feuerwerk für die Kleinstadt“. Dohromady 120 scenow za jako „lětnja komedija z Łužicy“ připowědźeny pask buchu w běhu 30 dnjow w Grodku a wokolinje nawjerćane. Mjez akterkami a akterami, kotřiž cyłkownje 65 figurow sćělesnjeja, su na přikład Petra-Marija Bulankec-Wencelowa z Němsko-Serbskeho ludoweho dźiwadła, bywši redakciski nawoda telewizijneho magacina Łužyca Helmuth Henneberg, Choćebuski hrajer Daniel Ratthei a łužiskemu publikumej mjez druhim z lětušeho wječorneho ptačokwasneho programa Serbskeho ludoweho ansambla znata Božena Bjaršec.