Hrajne zjednoćenstwo, wobstejace z koparskeju rezerwow Sokoła Ralbicy/Hórki a ST Marijineje hwězdy, hlada dosć spokojom na prěnju połseriju. Handrij Jakubaš a Syman Zimmermann staj jako nowaj trenarjej poměrnje derje do sezony startowałoj. Po šestym hrajnym dnju steješe jeju mustwo samo tydźeń na čole tabulki a bě hač do kónca septembra njeporažene. Tež we wokrjesnym pokalu hrajachu jara derje sobu. W prěnim kole přećiwo Budyšinkej jasnje z 5:0 dobychu a w druhim kole postarachu so samo wo mału překwapjenku. Přećiwo klasu wyše hrajacemu cyłkej z Kinsporka/Łužnicy dobychu doma 2:1 a zaćahnychu do wosmifinala. Tam nastupichu přećiwo Lubušej (wokrjesna liga) a móžachu 90 mjeńšinow sobu dźeržeć (1:1). W dwójce pjatnaće mjeńšinow trajacym přidatnym hrajnym času pak mocy popušćichu a hólcy poćerpichu poražku 1:5. W oktobrje hižo tak derje njeběžeše. Přećiwnicy z hornjeje połojcy tabulki běchu prosće sylniši a tak dožiwi rezerwa tři poražki pospochi. Na předposlednim hrajnym dnju pak zaso wyskachu. Přećiwo druhemu tabulki Jednoće Kamjenc dobychu 5:1.