Třeći ligist FC Energija Choćebuz dźe jako nazymski mišter do krótkeje zymskeje přestawki. To zaleži tež na špatnych wuslědkach konkurency na poslednim hrajnym dnju prěnjeje połserije. Što su přičiny za to? A što je z nadźiju na postup do druheje ligi? Kapitan FC Energije Choćebuz Axel Borgmann w rozmołwje z našim reporterom Georgom Zielonkowskom.

Hdyž so lěto nachila, drje wjele ludźi rady na nje zhladuje. Tež kapitan nazymskeho mištra třećeje koparskeje ligi Němskeje?

A. Borgmann: Myslu sej, zo móžemy wšitcy jara spokojom być. Smy stabilne prěnje koło ze sylnej kopańcu hrali a njejsmy so wot poražkow znjeměrnić dali. Twjerdźu, zo stejimy z prawom cyle horjeka w tabulce.

Do sezony je rěkało, zo dyrbi Energija wšitko činić, zo njeby zestupiła. Nětko pak zhladuje mustwo wot cyle horjeka na konkurencu. Su Choćebuženjo w awgusće wědomje hłuboko staplowali?

A. Borgmann: Ně, to njejsmy, dokelž wšak kóždy wě, zo je za postupnika druhe lěto jasnje ćeše. Runje hdyž sy jako nowačk do toho tajki hórki kónc ze skomdźenym postupom dožiwił, je we hłowach něštožkuli wisajo wostało.