My šulerjo Serbskeje zakładneje šule ,,Michał Hórnik“ Worklecy smy loni srjedź decembra adwentny koncert w našej sportowej hali wuhotowali. Koncert měješe titul ,,Dohodowny dyrdomdej“. Předstajichmy w nim hodowne nałožki druhich krajow.

W septembrje smy z probami započeli. Zwučowachmy w třoch skupinach: rejowarki, dźiwadźelnicy a chór. Chór nawjedowachu knjeni Ošikowa, knjeni Cyžowa a knjez Hejduška. Wo dźiwadło postara so knjeni Hojerec, kotraž bě tež stawiznu, tak mjenowany libreto, napisała. Reje je Katharina Hermanowa wot Serbskeho ludoweho ansambla z nami nastudowała. Tydźeń do koncerta zwučowachmy wosebje intensiwnje w sportowej hali. Wučerjo a domownicy přihotowachu jewišćo a cyłu halu. Pjatk dopołdnja, na dnju koncerta, přewjedźechmy ze wšěmi sobuskutkowacymi generalku.