Wotrow. Sobotu su we Wotrowskim młodźinskim klubje w starej šuli 14. raz woblubowany kickerowy turněr zarjadowali. Dohromady so na nim 42 mustwow wobdźěli. Wone buchu do šěsć skupin rozdźělene a wubědźowachu so wot něhdźe 15 hodź. w skupinskej fazy. Z elanom hrajerjo wo kóždy bul wojowachu. Tež tójšto přihladowarjow tam bě. Dohromady bě jich něhdźe 140 ludźi přišło, mjez nimi něhdźe 50 fanow, kotřiž so wo dobru naladu postarachu.
Po skupinskej fazy slědowaše k.o.-koło. Tu móžeše kóždy zmylk kónc woznamjenjeć. Přidatnje zarjadowachu tak mjenowane lucky-loser-koło. Tam doby team „Bjezbóžnych“ přećiwo „Horncej a wěku“. Tež tróštne koło bu wuhrate, tak zo móžachu wšitke mustwa hač do kónca pódla być. Najlěpši wubědźowachu so we hłownym kole. W finalu steještej sej mustwje „Asterix a Obelix“ a „Fun“ napřećo. Přihladowarjo kóždu akciju kedźbliwje sćěhowachu. Na kóncu doby mustwo Wotrowčanow Floriana Kreuza a Jakuba Wjacsławka. Team „Fun“ bu druhe a třeće městno wobsadźi dwójka tonuškow „Le Möv“, kotraž bě do toho hižo dwójce dobyła.
