Sokoł Ralbicy/Hórki –

TSV Wachau 1:1 (1:0)

Zestawa domjacych: Schöne – Wałda, P. Šołta, B. Heidorn, Mikławšk (51. Rawš), L. Heidorn, Mjechela (73. Bejmak), Hicka, N. Šnajder, J. Šołta (54. A. Woko), R. Šnajder

Na poslednju dypkowu hru wočakowachu Sokoljo hosći z Wachauwa. Mustwo steješe na poslednim městnje tabulki a hižo do hry bě jasne, zo do wokrjesneje ligi zestupi. Ralbičenjo pak mějachu štwórte městno hižo wěste a chcychu sej z dobrym wukonom sebjewědomje za pokalne finale skrućić.

Mało přihladowarjow běše při horcych temperaturach puć do stadiona „Jurij Frencl“ namakało. Nažel hra tež wjelelubjaca njebě. Bul pohibowaše so zwjetša mjez šěsnatkomaj. Hosćo zady derje stejachu a Sokołam so w ofensiwje wjele njeporadźi. Prěnja šansa dnja nasta hakle w 27. mjeńšinje. Hrajer hosći třěli ze zdalenosće wótrje na wrota a Ralbičanski wrotar kulowatu kožu na žerdź storči. Nětko Ralbičenjo wotućichu a Janek Mikławšk bu na lěwej stronje swobodnje hraty. Jeho třělwu pak wrotar k róžkej wotwobara. Tuž dźěše bjez wrotow do kabiny.