Slepo. Chór Lipa z Pančic-Kukowa je předwčerawšim, njedźelu, w Slepom nazymski koncert wuhotował. Tajke wurjadne dožiwjenje lědma hdy dožiwjach. Přichwatało je něhdźe 90 wopytowarjow. Za nich dyrbjachu zdźěla hišće stólcy přistajić. Hižo wot prěnjeho spěwa „Ha widźu-li ptačata ćahnyć“ běch přewšo hnuty. Tónle spěw smy naposledk k po­hrjebej našeje Leńki Nowakoweje spě­wali. Tehdy začuwachmy, kak ptački preč ćahnu, jako so kašć do zemje pušći – to so něšto pola nas zhubi. Ale nětko je tute „Ha widźu-li ...“ nas nutřkownje wote­wzało. Jako potom hišće Fabian Kaulfürst kóždy programowy blok w slepjanšćinje připowědźi, docpě chór tež wutroby poslednich připosłucharjow. Wosebje jasnosć jednotliwych hłosow zmóžni teksty połnje zapřimnyć. Móžu sej derje předstajić, kelko zwučowanjow je trěbne, doniž­ tajkile wustup bjez techniki nje­zmištruješ. Wulki kompliment na tymle městnje dirigentce Jadwize Kaulfürstowej. Dobra ideja bě tohorunja wobsahi spěwow němsce na programowe cedlki napisać. Derje, zo publikum z přikleskom njelu­towaše.