Zhromadne wozjewjenje

póndźela, 02. nowembera 2020 spisane wot:

Drježdźany (B/SN). 22. oktobra wu­­zběh­nychu zastupjerjo čłonskich cyrkwjow „Lutherskeho swětoweho zwjazka“ w Srjedźnej Europje chutne wohroženje čłowjestwa přez koronapandemiju. Biskopja namołwjeja k mjezsobnej po­mocy, k přepruwowanju swójskeho žiwjenskeho wašnja a proša w modlitwje njepopušćić. Podpisał je wozjewjenje tež sakski krajny biskop Tobias Bilz.

Nastaće noweje Tory

Tež w Sakskej ASP wudyriła

póndźela, 02. nowembera 2020 spisane wot:

Krušwica/Drježdźany (SN/at). Friedricha Löfflerowy institut je wobkrućił, zo bě minjenu wutoru na terenje gmejny Krušwi­cy, Zhorjelski wokrjes, třělene dźiwje swinjo z afriskej swinjacej mrětwu (ASP) inficěrowane. Zwěrjo su 29. oktobra w krajnym přepytowanskim wustawje přepytowali a minjeny pjatk wuslědk wozjewili, kaž sakske socialne ministerstwo zdźěli. Paralelnje k tomu třělene dźiwje proso pak njebě so natyknyło.

Ministerstwo připowědźi we wothłosowanju z lokalnymi zarjadami a poradźowacej skupinu wěcywustojnych wu­tworjenje trěbnych zawrjenskich pasmow. Naprawy sakskeho knježerstwa su na to wusměrjene, dalšim schorjenjam mjez dźiwimi swinjemi zadźěwać.

Přisłušna statna ministerka Petra Köpping (SPD) apeluje na plahowarjow swini, „zo njebychu w jich prócowanju popušćili, swójske wobstatki škitać a naprawy biowěstoty konsekwentnje dale sćěhować.“ Kaž wona rjekny, „smy derje na chutny pad přihotowani“. Mjez druhim zarjaduja krizowy stab socialneho ministerstwa a krajneho centruma k wojowanju přećiwo zwěrinskim mrětwam.

Merz liči z digitalnym zjězdom

póndźela, 02. nowembera 2020 spisane wot:

Berlin (dpa/SN). Kandidat za předsydu CDU Friedrich Merz z tym njeliči, zo móža zjězd strony srjedź januara po zwučenym wašnju wotměć. „Njemóžu sej to, sprawnje prajene, předstajić“, rjekny Merz dźensa rano w sćelaku Deutschlandfunk. Wón na to pokaza, zo je zwjazkowa kanclerka Angela Merkel (CDU) připowědźiła, zo móhli wobmjezowanja zjawneho žiwjenja koronawirusa dla hač do februara płaćić. „Tuž budźe to drje digitalny zjězd“, Merz rjekny. Na nim chcedźa noweho předsydu CDU wuzwolić.

Testuja wšu ludnosć na koronu

Bratislava (dpa/SN). W Słowakskej su minjeny kónc tydźenja mjezynarodnje wjele wobkedźbowanu akciju zahajili. Z njej chcedźa nimale cyłu ludnosć dwójce na koronawirus testować. W prěnim kole knježeše w 5 000 testowanskich centrach kraja wulki nawal. Njedźelu bě połoženje w čłonskim kraju EU z nimale 5,5 milionami wobydlerjemi měrniše. Po informacijach knježerstwa su prěni dźeń ně­hdźe 2,5 milionow ludźi testowali a při tym 25 850 natyknjenych wosobow zwěsćili, štož je něhdźe procent.

Jednaja wo skóržbje Ruskeje

Ćežke zemjerženje na zapadźe Turkowskeje a w Grjekskej je sej znajmjeńša 79 smjertnych woporow žadało. Zemjerženje ze sylnosću 6,6 bě kónčinu minjeny pjatk popołdnju střasło. W turkowskim Izmiru (hlej wobraz) su pomocnicy dźensa po 65 hodźinach třilětnu holčku z rozwalinow wjaceposchodoweho domu wućahnyli. Foto: pa/Halil Fidan

Wulki njeměr do wólbow w USA

póndźela, 02. nowembera 2020 spisane wot:
Washington (dpa/SN). Prezident USA Donald Trump chce dźensa hišće raz wšitke mocy nałožować a sej hłosy wolerjow za druhu hamtsku periodu zawěsćić. Kaž z naprašowanjow wuchadźa, ma wužadar Joe Biden předskok. Po wčerawšich pjeć wólbnych zarjadowanjach planuje Trump tuž dźensa hišće raz tři dalše. Wosebje koncentruje so wón na kraje, hdźež njejsu so wolerjo hišće rozsudźili. Demokratiski kandidat Joe Biden je tohorunja hišće po puću. Na poslednim dnju do wólbow je mjez druhim wustup ze znatej spěwarku Lady Gaga předwidźany, kotraž Bidena mócnje podpěruje. Tež bywši prezident USA Barack Obama je jemu poboku. Mjeztym pak wubudźi rozprawa medijow njeměr, po kotrejž chce so Donald Trump sam dočasnje jako dobyćer wólbow wuwołać.

Dalše protesty

póndźela, 02. nowembera 2020 spisane wot:

Drježdźany/Mnichow (dpa/SN). Tysacy ludźi su minjeny kónc tydźenja w Drježdźanach a Mnichowje přećiwo naprawam koronawirusa dla protestowali. W sakskej krajnej stolicy je so sobotu něhdźe 3 000 ludźi na naměsće před Semperowej operu zhromadźiło. Zarjadowarjo běchu tysac ludźi přizjewili. Mnozy přińdźechu bjez nahubnika a pokazachu kontrolowacym policistam lěkarski atest, zo žadyn njetrjebaja.

W Mnichowje je wčera něhdźe 1 900 ludźi na Theresijnej łuce přećiwo naprawam korony dla protestowało. Zarjadowarjo běchu planowanu zhromadźiznu jako Božu słužbu přizjewili. Jako so zarjadowanje dale a bóle na koncert wuwiwaše, policija demonstraciju skónči.

Nowe naprawy w Sakskej – AfD skorži

póndźela, 02. nowembera 2020 spisane wot:

Drježdźany (dpa/SN). Sakska přiběraceje ličby koronainfekcijow dla runja druhim zwjazkowym krajam wot dźensnišeho dźěl zjawneho žiwjenja dale wobmjezuje. Wotpowědne naprawy je krajne knježerstwo minjeny pjatk wobzamknyło. Wone maja hač do kónca nowembra płaćić. Ministerski prezident Michael Kretschmer (CDU) w rozhłosowej narěči potwjerdźi, zo strowotniski system swobodneho stata wšědnje tysac nowych koronainfekcijow dla poněčim mjezy swojeje wukonliwosće docpěwa. Tohodla je wažne, nětko jednać a mjezsobne kontakty na absolutny minimum wobmjezować.

Zjawne institucije kaž dźiwadła, koncertne žurle, muzeje a sportnišća wo­stanu zawrjene. To płaći tež za kupanske hale, sawny, fitnesowe studija, diskoteki, kazina, opery, kina a zwěrjency. Šule a pěstowarnje wostanu wotewrjene.

AfD bě hižo minjeny pjatk připowědźiła, zo chcyła dźensa sudnisku skóržbu přećiwo wobmjezowanjam korony dla zapodać. Wona ma naprawy za dospołnje přehnate a njewoprawnjene.

Nowu čaru njetwarja

póndźela, 02. nowembera 2020 spisane wot:

Wobswětoškitne wobmyslenja přećiwo dróze z Wósporka do Choćebuza

Drježdźany (SN). We wobłuku struktur­neje změny w zwisku ze skónčenjom zmilinjenja brunicy planowany twar nowe­je dróhi mjez awtodróhu A 4 pola Wósporka hač k awtodróze A 15 južnje Choćebuza je tak derje kaž z blida. Tole je Sakske wobchadne ministerstwo zdźě­liło. Porno tomu chcedźa druhe planowane projekty zwoprawdźić. Tak chcedźa železniskej čarje­ mjez Drježdźanami ­a Zhorjelcom kaž tež Berlinom a Zhorjelcom elektri­fikować. Nimo toho planuja dale wutwar a rozšěrjenje awtodróhi A 4 mjez Drježdźanami a mjezu Pólskeje.

Za podlěšenje zwjazkoweje dróhi B 178 wot Wósporka do Choćebuza njewidźi pak sakske wobchadne ministerstwo žanu „šansu na zwoprawdźenje“, w zdźělen­ce rěka. Předewzaće běchu nastorčili, zo bychu regionalne wuwiće łužiskeho žiwjenskeho a hospodarskeho regiona z lěpšim wobchadnym přizamkom k Ber­linskej a Choćebuskej kónčinje polěpšili.

To a tamne (02.11.20)

póndźela, 02. nowembera 2020 spisane wot:

Wobsedźerjo zwěrjatow w Awstralskej su zwólniwi, tójšto pjenjez wudać, zo bychu swojich lubuškow zaso widźeli: Wjacore swójby su 100 000 awstralskich dolarow (60 000 eurow) hromadźili, zo bychu lětadło do Kanady pósłali. Tam běchu woni před lětom swoje kóčki a psy wostajili jako do Awstralskeje wupućowachu. Koronakrizy dla njemóžachu zwěrjata bjezpo­srědnje sobu wzać, dokelž ma Awstralska w tym zwisku jara krute zakonje.

Třoch młodostnych z wulkeho sušaka drastow wuswobodźiła je wohnjowa wobora w jendźelskim měsće Epping. Sobudźěłaćerjo płokarnje běchu pomocnikow wołali. Dwaj młodostnaj běštaj do mašiny zalězłoj, třeći bě z nohu w durjach tčacy wostał. Wobornicy dyrbjachu durje z ćežkej techniku wotstronić. Po tym młodostnych lěkarsce zastarachu. Što woni w sušaku chcychu, njeje znate.

EU poboku Francoskeje

pjatk, 30. oktobera 2020 spisane wot:

Brüssel (dpa/SN). Po smjertnym nadpadźe z nožom w francoskim měsće Nizza su statni a knježerstwowi šefojo EU Francoskej swoju solidaritu wuprajili. „Zasudźamy tele nadpady, kotrež su zdobom nadpad na naše hódnoty, najraznišo“, rěka­ w zhromadnej deklaraciji, kotruž je šef­ Rady EU Charles Michel wčera wječor wozjewił. „Stejimy kruće w swojej so­li­­dariće poboku Francoskeje.“ Islamistiski atentatnik bě wčera w cyr­kwi tři ludźi­ zakłół a wjacorych zranił.

Trump: Nihdy wjace lockdown

Tampa (dpa/SN). Prezident USA Donald Trump je najebać po wšěm swěće při­běrace ličby koronainfekcijow dalše wobmjezowanja zjawneho žiwjenja w USA wuzamknył. „Lockdown nihdy wjace nječinimy“, rjekny wón wčera na wólbnobojowym zarjadowanju w Tampje w zwjazkowym staće Florida. Při tym poćahowaše so wón tež na Němsku a Francosku a na tam wukazane naprawy. Byrnjež ličba nowych infekcijow w USA na mjeztym 79 000 w běhu dnja rozrostła, bě sej Trump wěsty, zo je kriza bórze přetrata.

Wuhlady trochu lěpše

nowostki LND