Berlin (dpa/SN). Najebać diskusiju wo škiće klimy a wo škódnych maćiznach w powětře je po wuslědkach najnowšeho naprašowanja jenož mały dźěl šoferow zwólniwy so jězdźenja z awtom wzdać. Nimale dwě třećinje woprašanych (63,9 procentow) wotmołwi na wotpowědne prašenje ze „skerje nic“ abo „na žadyn pad“, kaž wčera wozjewjene naprašowanje Berlinskeho dźenika „Tagesspiegel“ wunjese. Jeno 27,7 procentow móhło sej to předstajić. Zdobom tři štwórćiny kritizuja, zo zwjazkowe knježerstwo přemało za bliskowobchad a za kolesowarjow čini. Prašeli běchu so 2 500 ludźi.
Předewšěm we wjesnych kónčinach nochce – abo njemóže – nichtó bjez awta być. Porno tomu je to w městach wjace hač połojca. Předewšěm wolerjo Zelenych (dobre 60 procentow) a Lěwicy (nimale 50 proc.) móhli sej žiwjenje bjez awta předstajić. Porno tomu njeje za 73,3 procenty přiwisnikow CDU/CSU a 80,3 proc. wolerjow FDP – mjez wolerjemi AfD samo 86,9 procentow – wšědny dźeń bjez awta předstajomny. Powšitkownje bě zwólniwosć, so awta wzdać, na wuchodźe mjeńša hač na zapadźe.
Po spektakularnej jězbje po pastwach, mostach a samo awtodróze je wusłužene lětadło Boeing 747 w Nižozemskej swój posledni cil docpěło: zahrodu hotela njedaloko Amsterdamskeho lětanišća Schiphol. Mašinu chcedźa nětko na atrakciju za hosći přewarić. Transport je hotel miliony eurow płaćił a tójšto wušparanjow načinił: Tak dyrbjachu burow za wužiwanje łukow wotškódnić, trjebachu njesměrnje wjele zarjadniskich dowolnosćow a dyrbja nimo toho dosć drohi transport zapłaćić.
Tři měsacy bě wona swobodna – nětko su ćeknjenu kruwu „büxi“ zaso popadnyli. Bywši policist, kiž zdobom hońtwjeri, je skoćo njedaloko bayerskeho Landshuta z kłokom pohłušił. Škitarjo zwěrjatow je na to wotewzachu a zastarachu. Kruwa bě so prawidłownje wječor při picnym składźe ratarskeho zawoda posłužowała. Tam je policist z třělbu na nju łakał. Büxi bě w oktobru ćeknyła.
Drježdźany (dpa/SN). W tarifowym konflikće w zjawnej słužbje krajow su dźěłarnistwa w Sakskej za přichodny tydźeń warnowanske stawki připowědźili. Wot wutory měło so dźěło we wjacorych regionach złožić, dźěłarnistwje GEW a ver.di dźensa zdźělištej. Spočatnje su přistajeni kraja w sewjernej Sakskej a Lipšćanskej kónčinje namołwjeni. Štwórtk wočakuja stawki w Drježdźanach a Budyšinje. Dźěłarnistwo žada sej šěsć procentow wjace mzdy, znajmjeńša pak 200 eurow.
Nowa centrala tajneje słužby
Berlin (dpa/SN). Nimale jědnaće lět po połoženju zakładneho kamjenja je zwjazkowa kanclerka Angela Merkel (CDU) dźensa nowu centralu zwjazkoweje tajneje słužby BND w Berlinje wotewrěła. Zaćahnyli běchu prěni sobudźěłaćerjo hižo w januaru. Tak ma w Berlinje nětko 4 000 z cyłkownje 6 500 sobudźěłaćerjow tajneje słužby městno. Techniski wotrjad wostanje dale w bayerskim Pullachu. Nowotwar bě wjace hač miliardu eurow płaćił, zaplanowali běchu 750 milionow.
Policija: Žane zapalerstwo
Drježdźany (dpa/SN). K wopomnjenju zničenja Drježdźan 13. februara 1945 maja zamołwići tuchwilu přizjewjenja za wjace hač 20 demonstracijow, wopominanskich stražow a zhromadźiznow na blidźe. K tomu słuša čłowjeski rjećaz 13. februara wječor, na kotryž wočakuja po informacijach města něhdźe 11 000 ludźi, kotřiž chcedźa sej jako znamjo měra ruku zawdać. Wyši měšćanosta Dirk Hilbert (FDP) je zhromadnje ze zastupnikami hospodarstwa, wědomosće, kultury, dźěłarnistwow, cyrkwjow a židowskeje wosady ludźi namołwjał, so na čłowjeskim rjećazu wobdźělić.
Britiscy a ameriscy bombowcy běchu Drježdźany 13. februara 1945 a w dnjach po tym zničili. Něhdźe 25 000 ludźi je při tym žiwjenje přisadźiło. Neonacije běchu minjene lěta datum stajnje zaso znjewužiwali, zo bychu złóstnistwa nacijow relatiwizowali. Lětsa planuja prawicarjo 15. februara „wopominanski pochod za wopory nadpada“ z 500 wobdźělnikami. Přećiwni demonstranća wočakuja wjace hač tysac wobdźělnikow.
Z njewšědnym dźěćacym widejom pyta katolska wosada w hessenskim Petersbergu za nowym duchownym. Zastupnicy wosady su zhromadnje z ministrantami widejo nawjerćeli, kotryž je na internetnej platformje youtube přistupny. Zajimcy su sej jón mjeztym 6 200 króć wobhladali. W nim hólcy a holcy skorža, zo hižo měsacy na noweho duchowneho čakaja, po tym zo bě dotalny wosadu wopušćił. Nowy duchowny měł cool a wjesoły być. Město dołhich prědowanjow přeja sej młodostni wjace kěrlušow.
Napity do wukładneho wokna modoweho wobchoda zajěł je muž w Bremenje a je sej po tym w awće wusnył. Jako policija dojědźe, motor hišće běžeše. 23lětny so spjećowaše, z awta wulězć a chcyše radšo dale spać. Najebać to jeho zastojnicy zhromadnje z awta wućahnychu, naměrjejo pola njeho 1,3 promile alkohola.
Podstupim (dpa/SN). Dźěłarnistwa a Zwjazk zastojnikow chcedźa hladajo na tarifowe jednanja za přistajenych zjawneje słužby ćišć na dźěłodawarjow zwyšić, zo bychu zastatk w zasłužbje wurunali. „Koleginy a kolegojo maja woprawdźe wjele pary w kotole“, rjekny zwjazkowy předsyda zwjazka zastojnikow Ulrich Silberbach nowinarjam. „Nochcemy zwisk k powšitkownemu wuwiću mzdow zhubić. Tule ležimy štyri procenty wróćo.“ Tarifowe jednanja za něhdźe milion přistajenych zjawneje słužby su wčera w Podstupimje w druhim kole zahajili.
Rada Załožby za serbski lud ma so na posedźenju 7. meje w Budyšinje w nowej zestawje skonstituować. W tymle zwisku je sej zastupnistwo Serbski sejm na januarskim wuradźowanju we Wětošowje přerjadowanje załožboweje rady pominało.
Budyšin (SN/at). Zestawa gremija měła so „wotpowědnje mjezynarodnje připóznatych zasadow mjeńšinoweho škita reformować“, bě z kruha wobdźělnikow zhonić. Wosebje dźe Serbskemu sejmej wo to, samopostajowanje Serbow skrućić. Z nowinskeje zdźělenki wuchadźa namjet, załožbowu radu wo štyrjoch dalšich serbskich čłonow rozšěrić. Docpěć chcedźa wjetšinu zastupjerjow našeho ludu. Při tym wupraja so zdobom za to, zo su Hornjoserbja a Delnjoserbja ze samsnej ličbu radźićelow zastupjeni.