Bórkowy/Budyšin (SN/MiR). Błótowske nocy wołaja! Kral Serbow Juro bije swoju poslednju bitwu. Tak znajmjeńša předwidźi to awtorka mjeztym sydom dźělnych jewišćowych produkcijow, dramaturgowka Serbskeho ludoweho ansambla, Jěwa-Marja Čornakec. „Njewěmy hišće, hač tež klětu zaso Błótowske nocy wuhotujemy“, praji rěčnik SLA Štefan Cuška, „to rozsudźi zarjadowar, hamt Bórkowy, na swojim zeńdźenju k wuhódnoćenju lětušich zarjadowanjow a planowanju přichodnych tajkich.“ Tutu sobotu změje produkcija SLA na jewišću pod wěžu Bismarcka we błótowskich Bórkowach swoju premjeru. Akterojo spěwaja live, hudźba pak přińdźe z paska. Mjez hrajerjemi su wospjet hosćo kaž Jakub Wowčer (Jorko), Julia Schmidt (Jolka) a Matthias Wagner (Juro). Titul „Spjelnjenje“ měri so na prašenje: Kotre poměry knjejstwa Łužicu přichodnje postaja? Wostanje Juro dale kral Serbow a zamóže wón swój lud škitać? Abo dobudźe hadźacy kral Wakapan na zakładźe swojich intrigow? Wotpowědnje myslenju awtorki, njewostanje jednanje na dawne, ale tež na dźensniše časy wjazane.

Zhorjelc/Budyšin (SN/MiP/MiR). Z hrajnym filmom „Franky Five Star“ su zarjadowarjo wčera wječor w Žitawje Nysowy filmowy festiwal (NFF) w Dźiwadle Gerharta Hauptmanna Zhorjelc/Žitawa zahajili. Lětuši festiwal je jubilejny, přetož přewjedźe so mjeztym hižo 20. raz.

Jako přezmjezny filmowy event, z dohromady 20 hrajnymi městnosćemi podłu Nysy w Němskej, Pólskej a Čěskej, je festiwal jónkrótny a słuša mjeztym ke krutemu wobstatkej kulturneho žiwjenja nic jenož pomjezneho regiona. Po słowach organizatorow „wotewru runje wjesne kónčiny wopytowarjam a filmowcam wosebite móžnosće zetkawanja a wuměny.“ Wosebje wabjace drje je, zo móža so wopytowarjo jednotliwych zarjadowanjow po předstajenjach z režiserami, akterami a dalšimi na filmach wobdźělenymi kaž tež organizatorami festiwala rozmołwjeć. Wšako su mnozy připrajili, zo na tón abo tamny filmowy wječor do Łužicy přijědu. Husto wuklinči wječor při lěhwowym wohenju w přewšo přijomnej atmosferje.

Chrósćicy (SN/MiR). Wot spočatka měrca wobsteji na Chróš­ćanskej zakładnej šuli „Jurij Chěžka“ wosebity chór. Syman Hejduška zwučuje ze šulerjemi, kotřiž su so za cyłodnjowy poskitk rozsudźili, znate a woblubowane kaž tež nowe spěwy. Kóždu wutoru klinča po Jednoće hłosy šulerjow, w prěnjej skupinje te 1. a 4. lětnika, w druhej te 2. a 3. lětnika. „Nawodnica kubłanišća Sabina Hejdušcyna je mje narěčała a so prašała, hač nochcył wutworić chór“, powěda Syman Hejduška, „a sym rady a hnydom připrajił, dokelž mje tajke projekty wabja.“ Něhdźe 40 dźěći je so rozsudźiło sobu spěwać. To pak nječinja jenož za sebje. Na lětušim 14. Mjezynarodnym folklornym festiwalu „Łužica“ chcedźa so w ramiku programa za dźěći zjawnje předstajić. „Do toho pak změja premjeru programa na Dnju talentow, kotryž kónc junija na šuli přewjedźemy“, praji Sabina Hejdušccyna. Tema tohole poskitka su serbske powěsćowe figury. Tuž spěwa chór wo wódnym mužu, připołdnicy a plonje. Su to spěwy, kotrež su dźěćom husto hižo znate. Na druhim boku pak zeznaja tež nowe štučki kaž tón wo Lutkach z pjera Bianki Wujeńcyneje a Symana Hejduški.

Bórkowy (PB/SN). Dźěłarničku z cyłkownje dźesać wobdźělnikami na temu fotografowanje su minjeny kónc tydźenja w Bórkowach a wokolinje přewjedli. Šula za delnjoserbsku rěč a kulturu bě work­shop organizowała. Při tym njesteješe jenož prawe wobchadźenje z kameru w srjedźišću, ale tež prawy wid na motiw a wotpowědne fotografiske přesadźenje. Zamołwitym dźěše wo to pokazać, zo technika sama žane dobre fota nječini. Samo z mobilnym telefonom su dźensa wuběrne fota móžne, hdyž na přikład „złote třihanje“ wobkedźbuješ abo perspektiwu fotografowanja změniš. Dokelž słušeja k foće tež rjane motiwy, su dźěłarničku z organizowanymi scenami błótowskich bajow a stawiznow wobohaćili. Z kolesom poda­chu so wobdźělnicy z Raduša do Bórkowow na statokaj Lierschojc a Möbertojc swójbow, kotrejž wobdźělnikam zmóžništej, tam fotografować. Pola Lierschojc steješe žiwjenje we wjesnych kónčinach w srjedźišću. W Möbertojc hornčerni wjerćeše so wšitko wokoło připołdnicy. Wottam měrjachu so kolesowacy kursis­ća na Lipje.