Žnjenc a požnjenc stej tradicionelnje měsacaj žnjenskich nałožkow w Hornjej kaž Delnjej Łužicy. Wosebje w Delnjej Łužicy je łapanje kokota rozšěrjene. Minjene tydźenje su jón na wjacorych wsach pěstowali, kaž tule w Strobicach. Jutře, sobotu, přeproše­ja mjez druhim w Mosće, Rogoznje a Popojcach na tónle nałožk, a to na wšěch třoch mětsnach wot 14 hodź. Foto: Michael Helbig

Wólbna protyka (24.08.17)

štwórtk, 24. awgusta 2017 spisane wot:

Přeprošatej na rozmołwu

Budyšin. Načolna kandidatka Lěwicy Katja Kipping a direktna kandidatka strony za wólby Němskeho zwjazkoweho sejma we wólbnym wokrjesu Budyšin I Caren Lay přeprošatej wobydlerjow jutře, pjatk, wot 17.30 do 19 hodź. na wosobinsku rozmołwu na swoje čerwjene křesło, kotrež budźe na Budyskich Žitnych wikach stać. Tam změja zajimcy składnosć, wo politiskich temach so rozmołwjeć a so wo zaměrach Lěwicy wobhonić.

Serbski spisowaćel Beno Budar (srjedźa sedźo) a předsyda zwjazka přełožowarjow Kazachskeje Kajrat Bagbergenow (5. wotlěwa) staj wčera w Chrósćicach na Jurja Chěžku spominali. Wonaj zbližištaj 3. a 4. lětnikej tamnišeje zakładneje šule, kotraž ma mjeno Chěžki, žiwjenje a skutkowanje serbskeho poeta. Bagbergenow chcyše na Swjedźeń serbskeje poezije přijěć. Swjatk, kotryž měješe­ Jurjej Chěžce wěnowany być, pak bě wupadnył. Tuž je priwatnje přijěł a dźěćom přednošował. Foto: Ludmila Budarjowa

Z parkowej železnicu pućować móža zajimcy­­ tež tónle kónc tydźenja zaso w Cho­ćebuzu. Wosebitu składnosć z parnej lokomotiwu na cyłkownje 3,2 kilometraj dołhej čarje z lokomotiwnikom Christianom Menzelom sobu jěć, su mnozy železniscy romantikarjo minjeny kónc tydźenja wužili. Železnica hišće hač do spočatka septembra wšědnje hosći wočakuje. Foto: Michael Helbig

K zakónčenju 15. chóroweho a instrumentalneho tydźenja w Domje biskopa Bena w Smochćicach předstaji něhdźe 70 wobdźělnikow z cyłeje Němskeje wuslědki swojeho dźěła, a to jutře, sobotu. Koncert pod hesłom „Italska chórowa hudźba“ wotměje so w 19.30 hodź. w cyrkwi swj. Bena. Zastup je darmotny, wo pjenježny dar so prosy. Foto: SN/Maćij Bulank

Twarnišćow je w Budyšinje tuchwilu dosć a nadosć, byrnjež Móst měra za wobchad zaso swobodny był. Tak přihotowachu sobudźěłaćerjo Klukšanskeho recyclingoweho zawoda tele dny wšitko za to, spotorhać byrgarske domy na Hasy při Młynskich wrotach. Za čas wottorhanskich dźěłow je přistup k pokładni Serbskeho ludoweho ansambla z Hasy při Młynskich wrotach wěstotnych přičin dla zaraćeny. Tola přez dwór SLA zajimcy puć ke kasy zawěsće tež namakaja. Foto: SN/Maćij Bulank

Na festiwal do Słowakskeje

pjatk, 21. julija 2017 spisane wot:

Hórki (SN/MiR). W słowakskej gmejnje Terchová wotměja wot 3. do 6. awgusta „Jánošíkove dni“. Tam chcedźa sej mnozy Serbja z busom dojěć, mjez nimi sobustawojo skupiny Čłonstwo za integraciju ludoweje akordeonoweje kultury. Mjeztym 55. mjezynarodny folklorny festiwal je pomjenowany po rubježniku Juraju Jánošíku­ (1688–1713), kotrehož maja Słowacy za narodneho rjeka.

Jězbu přihotujetaj mandźelskaj Brita a Volkmar Šołćic z Hórkow. „Předewšěm chcemy sej folklorne poskitki na festiwalnišću wobhladać. Za runje tak wažne wšak mamy, tež našu serbsku kulturu z hudźbu a spěwom prezentować.“ We wobłuku wuprawy chcedźa sej pućowacy hrodaj Oravskí a Bojnice kaž tež rězbarjeny Slovenský betlehem w Rajeckej Lesnej wobhladać. Přenocować budu w hotelu „Slovakia“ w Žilinje.

Hišće su někotre swobodne městna. Płaćizna za jězbu nima 150 eurow přesahać. Zajimcy, kotřiž chcyli sobu jěć, móža so pola Šołćic pod telefonowym čisłom 035796/ 95 012 přizjewić.

Wojerowska dźěćaca a młodźinska farma, kotraž je w nošerstwje Křesćansko-socialneho kubłanskeho skutka (CSB), je zajimcam tež za čas prózdnin dobra adresa wosebitych poskitkow dla. Minjenu srjedu wuhotowachu tam wjednica farmy Liane Semjank ze swojim teamom wokoło Michaela Schenkera ze zežiwjenskeho a zeloweho centruma CSB kulinariski dožiwjenski dźeń – tež z twarohom a lanym wolijom –, kotryž žněješe wulki wothłós. Foto: Ulrike Herzger

Skupina hosći z francoskeje Elsaskeje je dźensa Budyšin wopytała. Mjez druhim pobychu dopołdnja w Smolerjec kniharni. Tam wobhonichu so předewšěm wo serbskej literaturje. Basnica Róža Domašcyna (nalěwo) čitaše jim na to wjacore swójske basnje a prozowe teksty, tak zo dóstachu zajimowani hosćo tež zaćišć, kak naša maćeršćina klinči. Foto: SN/Maćij Bulank

Kamjenc. Tónle termin měli sej fanojo kopańcy hižo nětko w protyce našmórnyć. Po tym zo bě moderator Gert „Zimmi“ Zimmermann hižo w januaru patron turněra železnych knjezow Lokomotiwy Kamjenca a wo atmosferje zahorjeny, je wón nětko dalši wopyt w Lessingowym měsće připowědźił. Z bywšim trenarjom Energije Choćebuz Eduardom „Ede“ Geyerom chce so tam „Zimmi“ wo najlubšej sportowej družinje w Němskej rozmołwjeć. Zarjadowanje wotměje so štwórtk, 7. septembra, w 19 hodź. w Kamjenskim měšćanskim dźiwadle. Předpředań zastupnych lisćikow započnje so póndźelu, 10. julija, w 9 hodź. w sportowym wobchodźe na Kamjenskej Pfortenowej 3. Zastup­ płaći dźesać eurow.

nowostki LND