Dołho je trało, prjedy hač je mustwo FC Energije Choćebuz do štwórteje ligi Němskeje zjěło. Přispomnić pak so dyrbi, zo je po zestupje kompletnje nowe wobličo dóstało. Wjac hač tři dypki w prěnich štyrjoch hrach bych sej přiwšěm přał. Mjeztym pak maja Choćebuscy koparjo trěbnu harmoniju, kaž to minjene tři dobyća bjez přećiwniskich wrotow w mišterstwje a pokalu pokazuja. Na to chcedźa nawjazać, hdyž rěka přećiwnik přichodnu njedźelu w Choćebuskim Stadionje přećelstwa Budissa Budyšin. Zo ma ta w tabulce wosom dypkow mjenje hač Choćebuženjo, njeje trenarjej Clausej-Dieterej Wollitzej wažne: „Smy do partije wosmeho hrajneho dnja Budyšananow trójce wobkedźbowali: w hrě přećiwo Carl Zeiss Jenje, přećiwo Hertha BSC II a w Babelsbergu. Načolnikej z Jeny su woni na přikład njezbožownje podleželi, byrnjež přeswědčili. Nastajimy so na kompaktneho přećiwnika, kotryž spěšnje přešaltuje a chce akcije spěšnje wotzamknyć. Dyrbimy chětro kedźbować a dobru hrajnu disciplinu pokazać. Mi je tež wšojedne, zo pola Budissy Martin Hoßmang žołto-čerwjeneje karty dla pobrachuje.