Z dwěmaj mustwomaj su wolejbulistki z Pančic-Kukowa a z Worklec w nowej hrajnej dobje we wobwodnej lize zastupjene. W pokalnym kole stej wonej hižo hrałoj, nětko hotujetej so na prěni hrajny dźeń 10. oktobra we Worklecach. Z trenarjom Hrajneho zjednoćenstwa Pančicy-Worklecy Stephanom Mühlom je so Tereza Wićazowa rozmołwjała.
W sezonje 2020/2021 hrajeće z jednym mustwom Hrajneho zjednoćenstwa, minjenu sezonu běštej to dwě. Čehodla sće jenož jedne mustwo přizjewili? Kelko hrajerkow maće aktualnje w zjednoćenstwje?
S. Mühl: Za nowu hrajnu dobu smy jenož jedne mustwo přizjewili, dokelž njezmějemy wšelakich wobstejnosćow dla, na přikład přez wotchady, za dwaj cyłkaj dosć wolejbulistkow. Nimo toho z nazhonjenjow wěmy, zo bě hdys a hdys w prěnim kaž tež druhim zastupnistwje ćežko, dosć hrajerki za dypkowu hru hromadźe dóstać. To chcemy wobeńć a móžemy nětko z aktualneho kadra něhdźe dwaceći aktiwnych wolejbulistkow zasadźeć. Tak hodźi so zdobom fleksibelnišo a komfortabelnišo planować.