Europska motocrossowa elita wróći so po pjeć lětach přestawki zaso do Łužicy, a to 3. a 4. septembra 2022. Wo tym rozprawjachu Serbske Nowiny zašły kónc tydźenja w swojich krótkopowěsćach. Pod Kaponicu budu potom po pjećlětnej přestawce zaso pod profesionelnymi wuměnjenjemi sportować. Najwažniše informacije a fakty k najwjetšej motocrossowej seriji w Europje je tule Konstantin Hrjehor zestajał.
Što su ADAC MX Masters?
Serija ADAC MX Masters poskića ambicioněrowanym motocrossowym jězdźerjam profesionalne jewišćo. Wona bu wot najwjetšeho Europskeho awtomobilneho kluba ADAC do žiwjenja zwołana. Cil zarjadowanja je narodny sport skrućić a dorost spěchować. Mjeztym njeda so serija ze swěta motocrossa hižo wustorčić. Docpěte bu to dźakowano profesionalnej organizaciji, spušćomnemu planowanju a dobremu zhromadnemu dźěłu z motorskej industriju kaž tež angažementej zarjadowarjow. Motorska industrija je zastupjena přez zhotowjerjow kaž KTM, Suzuki, Kawasaki, Honda, Yamaha a Husqvarna.