Chorownje nastupajo winowatosć šćěpjenja zdźeržliwe, hladarnje ju witaja
Budyšin/Zhorjelc (SN/bn). Zwjazkowy sejm je „zakoń wo skrućenju šćěpjenskeje prewencije pře covid-19 a wo dalšich změnach předpisow w zwisku z koronapandemiju“ wobzamknył. Tak mjenowana šćěpjenska winowatosć za dźěłopřijimarjow we wobłuku strowotnistwa a hladanja je minjenu póndźelu płaćiwosć nabyła. W hornjołužiskich chorownjach a hladarnjach naprawa přewažnje dobry wothłós žněje. Tak zdźěli za zjawnostne dźěło Wojerowskeho jězorinoweho klinikuma zamołwity Gernot Schweitzer, zo „drje tuchwilu hišće posudźować njemóžemy, kak so winowatosć wuskutkuje, dokelž wotpowědne rjadowanja a móžne konsekwency hišće jasne njejsu. Naš prěnjorjadny zaměr je a wostanje, za imunizaciju wabić a šćěpjenja dale poskićeć.“ Jednaćel chorownjow swj. Jana w Kamjencu a swj. Carolusa w Zhorjelcu Lutz Möller piše: „Smy přeswědčeni, zo je šćěpjenje wulkeho podźěla ludnosće jenički wuspěch lubjacy wupuć z pandemije.