Schrift vergrößern
Trojozynk zaspěwa ze Serbskeho rozhłosa – sćelak wuhotowaše swójski programowy dypk – znatu štučku „Ja chcu“ kaž tež a cappella „Chory swět“.
Na beneficnych kulturnych zarjadowanjach hraje wuměłski aspekt podrjadowanu rólu. Wažnišej stej signal solidarity a suma pjenježnych darow. W tym zmysle běštej koncertaj na dobro Ukrainy, minjenej sobotu a njedźelu wot Towaršnosće k spěchowanju Serbskeho ludoweho ansambla w Budyskej „Krónje“ organizowanej, dosć wuspěšnej. Cyłkownje zezběrachu 13 600 eurow a přepokazachu je dobroćelskej załožbje St. Wolodymyr Fonds w Lwiwje.
Jako „Luiza, Johana a Józefina“ připowědźena trójka přednjese nowej spěwaj z (kompozitoriskeho) pjera Marhaty Cyžec a Wernera Měškanka.
Matej Dźisławk ze skupiny Astronawt a hóstna spěwarka Milena Wowčerjec předstajištaj spěwaj „Njewjedra“ a „Rozum“.
Chór Lipa zanjese pod nawodom Jadwigi Kaulfürstoweje na přikład „Quo vadis, Łužica?“ a „Přećelstwo“.Maćij Bulank
