Na mjezy mjez koparskimaj hrajnymaj dobomaj 2024/2025 a 2025/2026 je so sportowy reporter Georg Zielonkowski z trenarjom třećeho ligista FC Energije Choćebuz Clausom-Dieterom Wollitzom rozmołwjał. Předewšěm dźěše wo minjenu hrajnu dobu a wo skomdźeny postup do druheje zwjazkoweje ligi.

Po tym zo njeje so wulki són spjelnił – što Was wokomiknje jima?

C.-D. Wollitz: Sym njerozsudźeny. Zrudoba přewahuje, dokelž bě něšto historiskeho móžno. Tohodla sym přesłapjeny. Njewěm doskónčnje, čehodla je po 24. hrajnym dnju ta abo tamna hra tak cyle hinak wotběžała hač wočakowane. Hakle w poslednimaj hromaj smy swoju staro­znatu energiju zaso našli. Něšto druhe je w tutym času k tomu přišło: Wot nowembra smy so přehusto sylnych a wukonliwych hrajerjow wzdać dyrbjeli. Přichod pokaza, hač wulku šansu, so postupej bližić, hišće raz dóstanjemy.

Narěčiće znowa 24. hrajny dźeń, kotryž rady jako datum sportoweho přewróta definujeće. Dokelž po přěhraću hižo wšitko tajke njebě kaž do toho ….