Kak za sebje lěpje wabić?

srjeda, 04. septembera 2019
artikl hódnoćić
(0 )

Chrjebja (SK/SN). Partnerska iniciatiwa biosferoweho rezerwata Hornjołužiska hola a haty, kotraž stara so wo lěpše zwičnjenje prózdninskich domow a dowolowych bydlenjow, zetka so njedawno na Ladušec ratarskim statoku w Chrjebi. Iniciatiwa je jedna z 23 tajkich po wšej Němskej a jej přisłuša wjace hač 20 prózdninskich přebywanišćow. Hłownje zaběrachu so wobdźělnicy z prašenjom, kak móža małe předewzaća na polu turizma lěpje zwičnjeć a kak hodźi so za nje lěpje wabić. Ladušec ratarski statok – tam kombinuja aktiwne ratarstwo z hóstnymi stwami a předawanjom domjacych wudźěłkow – bě jedyn z prěnich, kotrež su we wobłuku biosferoweho rezerwata dowolowe přebytki poskićeli.

Serenada w zelenym

Stróža. Wječor do nazymskich přirodowych wikow w Stróži pola Hućiny přeproša zajutřišim, pjatk, w 19 hodź. na komorny koncert do tamnišeho zarjadnistwa biosferoweho rezerwata Hornjołužiska hola a haty. Tam předstaja twórby serbskich a słowjanskich komponistow. Program wuhotuja pianistka Liana Bertók,­ wiolinistka Josephine Kretsch­mar a sopranistka Elmira Yakhina. Zastup je darmotny.

Dopominaja na wuchowanje

Klětno. Klětu budźe tomu 30 lět, zo su Klětno před hrožacym wotbagrowanjom přez Bjerwałdsku brunicowu jamu wuchowali. Na tónle podawk chcedźa we wsy hódnje spominać. Na to skedźbni wjesna předstejićerka Annemarie Bahlo na zašłym posedźenju wjesneje rady. Za jubilej wutworjeny dźěłowy kruh planuje swjedźenski tydźeń přewjesć. Nětko dyrbja pruwować, kelko pjenjez móhli za to zaplanować. W dźěłowym kruhu, za kotryž móža so dalši zajimcy přizjewić, wo přihotach jubileja wuradźuja.

Jězba za romantikarjow

Běła Woda. Mužakowska lěsna železnica přewjedźe pjatk, 6. septembra, w 19.30 hodź. romantisku jězbu z parnej lokomotiwu z tajnym cilom. Jězdźenki skazać móža sej zajimcy pod telefonowym čisłom 03576/ 207 472.

wozjewjene w: Z městow a wsow
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND